સોની ટીવી પર પ્રસારિત થતો દેશનો સૌથી લોકપ્રિય ક્વિઝ શો ‘કૌન બનેગા કરોડપતિ’ની 17મી સીઝન હવે યાદગાર અંત સાથે પૂર્ણ થવા જઈ રહી છે. શોના અંતિમ એપિસોડ દરમિયાન હોસ્ટ અને સદીના મહાનાયક અમિતાભ બચ્ચન ભાવુક બન્યા હતા. વર્ષો સુધી આ શો સાથે જોડાયેલા બિગ બીએ પ્રેક્ષકો સામે દિલ ઠાલવીને કહ્યું હતું કે, “પ્રેક્ષકો છે તો જ આ શો છે. તમે લોકો ન હો, તો KBCનો અસ્તિત્વ જ ન રહે.”

KBC-17ના અંતિમ એપિસોડમાં અમિતાભ બચ્ચન માત્ર હોસ્ટ તરીકે નહીં પરંતુ એક સંવેદનશીલ કલાકાર તરીકે પણ દર્શકો સામે આવ્યા હતા. શોની શરૂઆતથી અંત સુધીની તેમની સફરને યાદ કરતાં તેમણે કહ્યું કે, તેમના જીવનનો એક તૃતીયાંશ ભાગ તેમણે આ શોમાં વિતાવ્યો છે. તેમણે ઉમેર્યું હતું કે, “કેટલીક યાત્રાઓ એવી હોય છે, જે ક્યારે શરૂ થઈ અને ક્યારે પૂર્ણ થઈ, તે સમજાય જ નહીં. આજે જ્યારે આ સીઝનનો અંત આવી રહ્યો છે, ત્યારે એવું લાગે છે કે જાણે આ બધું ગઈકાલે જ શરૂ થયું હોય.”

અંતિમ એપિસોડ દરમિયાન અમિતાભ બચ્ચન વારંવાર ભાવુક થયા હતા. તેમણે કહ્યું કે, વર્ષો દરમિયાન KBC માત્ર એક ટેલિવિઝન શો નથી રહ્યો, પરંતુ તે તેમની જિંદગીનો એક મહત્વપૂર્ણ હિસ્સો બની ગયો છે. તેમણે પ્રેક્ષકોનો આભાર માનતાં જણાવ્યું કે, “જ્યારે પણ મેં કહ્યું કે હું આવી રહ્યો છું, ત્યારે તમે મને ખુલ્લા દિલથી સ્વીકાર્યો છે. જ્યારે હું હસ્યો, ત્યારે તમે મારી સાથે હસ્યા, અને જ્યારે મારી આંખોમાં આંસુ આવ્યા, ત્યારે તમારી આંખોમાં પણ ભેજ આવી ગયો.”

આ ફિનાલે એપિસોડની ખાસ વાત એ હતી કે, અમિતાભ બચ્ચને માત્ર વાતો જ નથી કરી, પરંતુ પોતાના સુપરહિટ ગીતો ગાઈને દર્શકોને ભાવવિભોર કરી દીધા. શોના મેકર્સના જણાવ્યા અનુસાર, બિગ બીએ સતત લગભગ 30 મિનિટ સુધી ગીતો ગાઈને એક અનોખો રેકોર્ડ રચ્યો છે. આ દરમિયાન તેમણે ‘રંગ બરસે’, ‘હોલી ખેલે રઘુવીરા’, ‘મેરે અંગને મેં’ જેવા લોકપ્રિય ગીતો રજૂ કર્યા હતા. આ ગીતો સાથે સ્ટુડિયોમાં હાજર પ્રેક્ષકો પણ ઝૂમી ઉઠ્યા હતા અને સમગ્ર માહોલ ભાવનાત્મક બની ગયો હતો.

અમિતાભ બચ્ચને કહ્યું કે, સંગીત હંમેશા તેમની આત્મા સાથે જોડાયેલું રહ્યું છે અને KBCના મંચ પર ગીતો ગાવાનું તેમને વિશેષ આનંદ આપે છે. તેમણે ઉમેર્યું કે, “આ મંચ પર હું હંમેશા પોતાને ઘરમાં હોવાની લાગણી અનુભવું છું.” આ શબ્દો સાથે જ સ્ટુડિયોમાં હાજર ઘણા લોકો ભાવુક થઈ ગયા હતા.

ઉલ્લેખનીય છે કે, ‘કૌન બનેગા કરોડપતિ’નો પ્રારંભ વર્ષ 2000માં થયો હતો અને ત્યારથી અમિતાભ બચ્ચન આ શોની ઓળખ બની ગયા છે. વચ્ચે થોડા સમય માટે અન્ય હોસ્ટ આવ્યા હતા, પરંતુ પ્રેક્ષકો માટે KBC અને અમિતાભ બચ્ચન એકબીજાના પર્યાય બની ગયા છે. KBC-17ની પૂર્ણતા સાથે ફરી એકવાર આ સાબિત થયું છે કે બિગ બી અને આ શો વચ્ચેનો સંબંધ અતૂટ છે.

KBC-17 પૂર્ણ થયા બાદ અમિતાભ બચ્ચન ફરી એકવાર મોટા પડદા પર જોવા મળશે. તેઓ ટૂંક સમયમાં ‘સેક્શન 84’ ફિલ્મમાં અભિષેક બેનર્જી અને નિમ્રત કૌર સાથે મહત્વની ભૂમિકામાં નજરે પડશે. આ ઉપરાંત, તેઓ પ્રભાસ સ્ટારર મેગા પ્રોજેક્ટ ‘કલ્કી 2898 AD’ની સિક્વલમાં પણ મહત્વપૂર્ણ ભૂમિકા ભજવતા જોવા મળશે.

KBC-17નો અંતિમ એપિસોડ માત્ર એક શોની પૂર્ણતા નહીં, પરંતુ અમિતાભ બચ્ચન અને પ્રેક્ષકો વચ્ચેના ભાવનાત્મક સંબંધનો ઉત્સવ બની રહ્યો. વર્ષો સુધી લોકોના દિલ પર રાજ કરનારા બિગ બીએ એકવાર ફરી સાબિત કરી દીધું કે, “પ્રેક્ષકો છે એટલે જ આ સફર જીવંત છે.”