ગુજરાતના અમદાવાદ શહેરને આગામી વર્ષોમાં આંતરરાષ્ટ્રીય રમતગમતના નકશા પર મોખરે લાવવા માટે મોટા પગલાં લેવાઈ રહ્યા છે. 2030માં કોમનવેલ્થ ગેમ્સનું આયોજન અમદાવાદમાં થવાનું લગભગ ફાઈનલ થઈ ગયું છે અને 2036ના ઓલિમ્પિક્સ માટે પણ ભારતની મજબૂત દાવેદારી છે. આવા વૈશ્વિક સ્તરના ઇવેન્ટ્સને ધ્યાનમાં રાખીને શહેરના ઇન્ફ્રાસ્ટ્રક્ચર સાથે સાથે હોસ્પિટાલિટી સેક્ટરમાં પણ મોટા રોકાણના સંકેતો મળી રહ્યા છે.
 

પાંચ નવી વૈભવી હોટેલોના નિર્માણની તૈયારી

કોમનવેલ્થ ગેમ્સ પૂર્વેના બે વર્ષમાં અમદાવાદમાં ઓછામાં ઓછી પાંચ નવી આલીશાન વૈભવી હોટેલોનું નિર્માણ થવાની શક્યતા છે. આ હોટેલોમાંથી લગભગ 1000 નવા રૂમ ઉમેરાશે, જેના કારણે શહેરમાં આંતરરાષ્ટ્રીય મહેમાનો, ખેલાડીઓ, અધિકારીઓ અને પ્રવાસીઓને ઉચ્ચ સ્તરની સુવિધા મળી રહેશે. ડેવલોપર્સ દ્વારા પ્રોજેક્ટ માટેની દરખાસ્તો રજૂ કરી દેવામાં આવી છે અને હાલ મંજૂરીની પ્રક્રિયા ચાલી રહી છે.
 

સિંધુભવન રોડ બન્યો હોટેલ હબ

આ નવી હોટેલોમાંથી બે હોટેલો અમદાવાદના સૌથી વધુ વિકસતા સિંધુભવન રોડ વિસ્તારમાં નિર્માણ પામશે. આ વિસ્તાર છેલ્લા કેટલાક વર્ષોમાં બિઝનેસ, ફાઈન ડાઈનિંગ અને લક્ઝરી લાઈફસ્ટાઈલ માટે હોટસ્પોટ બની ગયો છે. મોટી હોટેલ બ્રાન્ડ્સ આ વિસ્તારને વ્યૂહાત્મક દૃષ્ટિએ મહત્વપૂર્ણ માની રહી છે.
 

જાણીતી હોટેલ બ્રાન્ડ્સની એન્ટ્રી

ચાલુ વર્ષના પ્રારંભે જ અમદાવાદમાં હોટેલ ઉદ્યોગમાં ગતિ આવી હતી. ઈન્ડિયન હોટેલ કંપની (IHCL) દ્વારા સિંધુભવન રોડ પર ‘ગેટવે અમદાવાદ’ શરૂ કરવાની જાહેરાત કરવામાં આવી હતી. 116 રૂમ અને સુઈટ ધરાવતી આ હોટેલ શહેરના લક્ઝરી સેગમેન્ટમાં નવી ઓળખ ઉભી કરશે. આ ઉપરાંત ‘જીંજર અમદાવાદ’ અને ‘ક્રિસ્ટાર’ હોટેલની પણ એન્ટ્રીની જાહેરાત કરવામાં આવી છે.
 

સ્થાનિક ડેવલોપર્સ પણ સક્રિય

યશસ્વી ગ્રુપના જીગર ભરવાડે જણાવ્યું હતું કે આગામી વર્ષોમાં અમદાવાદમાં આંતરરાષ્ટ્રીય રમતોત્સવ ઉપરાંત વ્યાપારી અને ઔદ્યોગિક ઇવેન્ટ્સમાં વધારો થશે. નવરંગપુરા વિસ્તારમાં 150 રૂમની હોટેલ માટે 3000 વારના પ્લોટ પર પ્રોજેક્ટનું આયોજન કરવામાં આવ્યું છે. વૈશ્વિક ઉદ્યોગકારોની વધતી આવકને ધ્યાનમાં રાખીને આ રોકાણ કરવામાં આવી રહ્યું છે.
 

આંતરરાષ્ટ્રીય જાયન્ટ્સનો વિશ્વાસ

અમેરિકા સ્થિત હોસ્પિટાલિટી જાયન્ટ મેરીયેટ ઇન્ટરનેશનલએ પણ અમદાવાદમાં હોટેલ રૂમની વધતી માંગ સ્વીકારી છે. અમદાવાદ અને વડોદરામાં જાણીતી બ્રાન્ડ હેઠળ નવી હોટેલ ખોલવાની તૈયારી ચાલી રહી છે. તાજેતરમાં ‘લે મેરીડીયન’ શરૂ કર્યા બાદ હવે સાબરમતી રીવરફ્રન્ટ નજીક નવા પ્રોજેક્ટ આવવાની શક્યતા છે.
 

સિંધુભવન રોડ પર વધુ એક મોટું પ્રોજેક્ટ

અમેરિકન હોટેલ ઉદ્યોગમાં મોટું નામ ધરાવતા હેરી પટેલ પણ સિંધુભવન રોડ પર નવા હોટેલ પ્રોજેક્ટની તૈયારીમાં છે. લગભગ 100 રૂમની હોટેલ માટે આંતરરાષ્ટ્રીય બ્રાન્ડ સાથે કોન્ટ્રાક્ટ થવાની શક્યતા છે, જેને વ્યૂહાત્મક વિસ્તરણ તરીકે જોવામાં આવી રહ્યું છે.
 

મોટા ગ્રુપ્સનું મેગા ઇન્વેસ્ટમેન્ટ

અમદાવાદના સંકલ્પ ગ્રુપના ડાયરેક્ટર દેવ્યા રોબિન ગોએન્કાએ જણાવ્યું કે કર્ણાવતી ક્લબ પાછળ 220 રૂમની હોટેલ બનાવવા માટે આંતરરાષ્ટ્રીય હોટેલ બ્રાન્ડ સાથે કરાર કરવામાં આવ્યો છે. કુલ 8 લાખ સ્ક્વેર ફૂટના પ્રોજેક્ટમાં અડધો હિસ્સો હોટેલનો રહેશે.

આ ઉપરાંત રાજયશ ગ્રુપ સિંધુભવન રોડ પર 11 લાખ સ્ક્વેર ફૂટના પ્રોજેક્ટમાં 250 રૂમની ફાઈવ સ્ટાર હોટેલ બનાવવાની યોજના ધરાવે છે. ગ્રુપના ડાયરેક્ટર રાજન શાહે કહ્યું કે કોમનવેલ્થ ગેમ્સ જેવા ઇવેન્ટ્સ દરમિયાન અમદાવાદમાં હોટેલ રૂમની ભારે માંગ રહેશે.
 

શહેરની અર્થવ્યવસ્થાને મળશે વેગ

આ તમામ પ્રોજેક્ટોથી અમદાવાદમાં રોજગારની તકો વધશે, પ્રવાસન ઉદ્યોગને વેગ મળશે અને શહેરની વૈશ્વિક ઓળખ વધુ મજબૂત બનશે. કોમનવેલ્થ ગેમ્સ અને ભવિષ્યના ઓલિમ્પિક્સને ધ્યાનમાં રાખીને અમદાવાદ ઝડપથી એક આંતરરાષ્ટ્રીય શહેર તરીકે વિકસી રહ્યું છે.