સ્થાનિક શેરબજારમાં આજે ભારે વેચવાલીના માહોલ વચ્ચે મોટો કડાકો જોવા મળ્યો હતો. દિવસની શરૂઆતમાં બજાર તેજી સાથે ખુલ્યું હતું, પરંતુ થોડા જ સમયમાં અચાનક વેચવાલીનો દબાણ વધતાં બજાર લાલ નિશાનમાં ધકેલાઈ ગયું. વિદેશી સંસ્થાગત રોકાણકારો (FII)ની સતત વેચવાલી, ઊંચા સ્તરે નફો વસૂલવાની પ્રવૃત્તિ અને વૈશ્વિક અનિશ્ચિતતાએ ફરી એકવાર ભારતીય શેરબજારને ઝાટકો આપ્યો છે.

બપોરે 2:23 વાગ્યે BSE સેન્સેક્સ 800.52 પોઈન્ટ એટલે કે લગભગ 0.97 ટકાના ઘટાડા સાથે 81,506.85 પર ટ્રેડ કરી રહ્યો હતો. સાથે જ નેશનલ સ્ટોક એક્સચેન્જનો નિફ્ટી 50 પણ 240.10 પોઈન્ટ અથવા 0.95 ટકા ઘટીને 25,049.80ના સ્તરે આવી ગયો હતો. બજારમાં આવેલા આ ભારે ઘટાડાના કારણે BSEમાં લિસ્ટેડ કંપનીઓનું કુલ માર્કેટ કેપિટલાઇઝેશન લગભગ ₹5.7 લાખ કરોડ ઘટીને ₹452.69 લાખ કરોડ રહ્યું હતું. છેલ્લા કેટલાક દિવસોમાં થયેલા ઘટાડાને જોતા કુલ મળીને અંદાજે ₹60 લાખ કરોડ જેટલી સંપત્તિ રોકાણકારોની ખાખ થઈ ગઈ હોવાનું માનવામાં આવે છે.

શુક્રવારે સવારે બજારની શરૂઆત હકારાત્મક માહોલ સાથે થઈ હતી. સેન્સેક્સ 82,335.94 પર ખુલ્યો હતો અને ટ્રેડિંગના પ્રારંભિક તબક્કામાં 82,516.27 સુધી પહોંચ્યો હતો. એશિયન બજારોમાં તેજી, તેમજ ગ્રીનલેન્ડ સંબંધિત ભૂ-રાજકીય ચિંતાઓમાં થોડી શાંતિના સંકેતોએ શરૂઆતમાં બજારને ટેકો આપ્યો હતો. પરંતુ ઊંચા સ્તરે પહોંચતા જ રોકાણકારોએ નફો વસૂલવાનું શરૂ કર્યું, જેના કારણે બજાર પર દબાણ વધ્યું.

નિષ્ણાતોના જણાવ્યા મુજબ, છેલ્લા કેટલાક સત્રોમાં બજારમાં ઝડપી તેજી જોવા મળ્યા બાદ હવે પ્રોફિટ બુકિંગ સ્વાભાવિક બની ગયું છે. ખાસ કરીને બેંકિંગ, આઈટી, ઓટો અને મેટલ શેરોમાં ભારે વેચવાલી જોવા મળી હતી. વિદેશી રોકાણકારો દ્વારા સતત વેચવાલી થવાથી બજારની ભાવના પર નકારાત્મક અસર પડી છે. ઉપરાંત, વૈશ્વિક સ્તરે વ્યાજદર અંગેની અનિશ્ચિતતા, ક્રૂડ તેલના ભાવમાં ઉથલપાથલ અને અમેરિકન બજારોમાંથી મળતા મિશ્ર સંકેતો પણ ભારતીય બજારને અસર કરી રહ્યા છે.

ઉલ્લેખનીય છે કે એક દિવસ પહેલા જ બજારે સતત ત્રણ દિવસના ઘટાડાનો સિલસિલો તોડીને થોડી રાહત આપી હતી. તેથી રોકાણકારોને આશા હતી કે બજાર હવે સ્થિરતા તરફ આગળ વધશે. પરંતુ આ આશા ટૂંક સમયમાં તૂટી ગઈ અને ફરી એકવાર બજાર લોહીલુહાણ બન્યું. ખાસ કરીને નાના અને મધ્યમ શેરોમાં વધુ દબાણ જોવા મળ્યું, જેના કારણે રિટેલ રોકાણકારોમાં ચિંતા વધી છે.

બજાર નિષ્ણાતો માને છે કે ટૂંકા ગાળામાં બજારમાં અસ્થિરતા યથાવત રહેવાની શક્યતા છે. જ્યાં સુધી વૈશ્વિક પરિબળો સ્પષ્ટ ન થાય અને વિદેશી રોકાણકારોની વેચવાલી પર અંકુશ ન આવે, ત્યાં સુધી બજારમાં દબાણ રહેવાનું શક્ય છે. તેઓ રોકાણકારોને સલાહ આપી રહ્યા છે કે અફરાતફરીમાં વેચાણથી બચવું અને મજબૂત આધાર ધરાવતા શેરોમાં લાંબા ગાળાની દૃષ્ટિ રાખવી.

આ સ્થિતિમાં બજાર માટે આવનારા દિવસો મહત્વપૂર્ણ બની રહેશે. મોંઘવારીના આંકડા, વૈશ્વિક સેન્ટ્રલ બેંકોની નીતિ અને વૈશ્વિક રાજકીય પરિસ્થિતિ બજારની દિશા નક્કી કરશે. હાલ માટે શેરબજારનું વાતાવરણ સાવચેતીનું છે અને રોકાણકારો માટે ધીરજ રાખવી સૌથી મોટી જરૂરિયાત બની ગઈ છે.