બોલિવૂડ અને સાઉથ ફિલ્મ ઈન્ડસ્ટ્રીના લોકપ્રિય કલાકારો રશ્મિકા મંદાના અને વિજય દેવરકોંડા ફરી એકવાર ચર્ચાના કેન્દ્રમાં આવ્યા છે. આ વખતે ચર્ચાનું કારણ છે બંનેએ રોમમાં સાથે ઉજવેલું નવું વર્ષ. છેલ્લા કેટલાક દિવસોથી રશ્મિકા મંદાના રોમમાં હોવાની ઝલક તેની સોશિયલ મીડિયા પોસ્ટ્સ પરથી મળી રહી હતી, પરંતુ હવે વિજય દેવરકોંડાએ શેર કરેલી તસવીરોએ ચાહકોની અટકળોને વધુ મજબૂત કરી દીધી છે.

વિજય દેવરકોંડાએ પોતાના સોશિયલ મીડિયા એકાઉન્ટ પર રોમની કેટલીક તસવીરો શેર કરી હતી. આ તસવીરોમાં વિજય એકલો નજરે પડે છે, પરંતુ એક તસવીરમાં એવી ઝલક જોવા મળે છે જેને ચાહકોએ તરત જ પકડી પાડી. તસવીરમાં વિજયના ખભા પર એક યુવતીનો હાથ જોવા મળે છે, જે રશ્મિકા મંદાનાનો હોવાનું માનવામાં આવી રહ્યું છે. આ નાનકડા સંકેતે સોશિયલ મીડિયા પર ધૂમ મચાવી દીધી છે.

ખાસ વાત એ છે કે રશ્મિકા અને વિજયે હજુ સુધી સાથે હોવાની કોઈ સીધી તસવીર શેર કરી નથી. પરંતુ બંને જ્યારે પણ સાથે વેકેશન પર જાય છે ત્યારે આવી જ રીત અપનાવે છે. તેઓ અલગ-અલગ તસવીરો પોસ્ટ કરે છે, પરંતુ તેમાં એવા સંકેતો છુપાયેલા હોય છે કે ચાહકો સમજી જાય છે કે બંને સાથે જ છે. રોમની આ તસવીરોમાં પણ એવું જ કંઈક થયું છે.

રશ્મિકા મંદાના છેલ્લા કેટલાય દિવસોથી રોમના ઐતિહાસિક સ્થળો, કેફે અને રસ્તાઓની તસવીરો સોશિયલ મીડિયા પર શેર કરી રહી હતી. રોમના પ્રખ્યાત આર્કિટેક્ચર, જૂના બિલ્ડિંગ્સ અને શાંત વાતાવરણ વચ્ચેની તેની તસવીરોને ચાહકો દ્વારા ખૂબ પસંદ કરવામાં આવી હતી. હવે વિજય દેવરકોંડાની તસવીરો સામે આવતા બંનેએ એકસાથે નવું વર્ષ ઉજવ્યું હોવાનું સ્પષ્ટ થતું જાય છે.

રશ્મિકા અને વિજયની મિત્રતા અને નજીકતા નવી નથી. બંનેની પહેલી મુલાકાત ફિલ્મ ‘ગીતા ગોવિંદમ’ દરમિયાન થઈ હતી. આ ફિલ્મમાં તેમની જોડી દર્શકોને ખૂબ પસંદ પડી હતી અને ત્યારથી જ બંનેના અફેરની ચર્ચાઓ શરૂ થઈ ગઈ હતી. ત્યારબાદ ‘ડિયર કોમરેડ’ જેવી ફિલ્મોમાં પણ બંને સાથે કામ કરી ચૂક્યા છે. સ્ક્રીન પરની તેમની કેમિસ્ટ્રી જેટલી લોકપ્રિય રહી છે, એટલી જ તેમની ઓફ-સ્ક્રીન બોન્ડિંગ પણ ચર્ચામાં રહી છે.

સમયાંતરે બંનેને એકસાથે એરપોર્ટ પર, રેસ્ટોરન્ટમાં અથવા વેકેશન દરમિયાન જોવામાં આવ્યા છે. જો કે, બંને હંમેશા પોતાના સંબંધ વિશે મૌન જ રાખ્યું છે. જ્યારે પણ મીડિયા દ્વારા સવાલ પૂછવામાં આવ્યા છે ત્યારે બંનેએ તેને માત્ર મિત્રતા ગણાવી છે અથવા પ્રશ્નને ટાળી દીધો છે.

હાલમાં સોશિયલ મીડિયા પર એક અન્ય ચર્ચા પણ જોર પકડી રહી છે. અનેક અહેવાલો મુજબ રશ્મિકા મંદાના અને વિજય દેવરકોંડા આગામી ફેબ્રુઆરી મહિનામાં લગ્ન કરવાની તૈયારીમાં છે. જો કે, આ બાબતે હજુ સુધી બંનેમાંથી કોઈએ પણ સત્તાવાર જાહેરાત કરી નથી. છતાં ચાહકોને આશા છે કે ટૂંક સમયમાં આ કપલ તરફથી ખુશખબર મળી શકે છે.

નવું વર્ષ રોમ જેવી રોમેન્ટિક જગ્યાએ સાથે ઉજવવાનું બંનેના સંબંધને લઈને અટકળોને વધુ મજબૂત બનાવે છે. ચાહકો સોશિયલ મીડિયા પર બંનેને શુભેચ્છાઓ આપી રહ્યા છે અને લગ્નની સત્તાવાર જાહેરાતની આતુરતાપૂર્વક રાહ જોઈ રહ્યા છે.

કામની વાત કરીએ તો રશ્મિકા મંદાના હાલમાં બોલિવૂડ અને સાઉથ બંને ઈન્ડસ્ટ્રીમાં વ્યસ્ત છે. તે અનેક મોટા પ્રોજેક્ટ્સમાં નજર આવવાની છે. બીજી તરફ વિજય દેવરકોંડા પણ પોતાની આગામી ફિલ્મોની તૈયારીમાં વ્યસ્ત છે. વ્યસ્ત શેડ્યૂલ વચ્ચે રોમમાં સાથે સમય પસાર કરીને નવું વર્ષ ઉજવવું બંને માટે ખાસ બન્યું હોવાનું માનવામાં આવી રહ્યું છે.

હવે જોવાનું રહ્યું કે રશ્મિકા અને વિજય તેમના સંબંધને ક્યારે સત્તાવાર રીતે જાહેર કરે છે. ત્યાં સુધી રોમની આ તસવીરો અને નવું વર્ષ સાથે ઉજવવાની ચર્ચાઓ ચાહકો વચ્ચે ચર્ચાનો વિષય બની રહેશે.