આગામી 14 જાન્યુઆરીએ રાજકોટના નિરંજન શાહ ક્રિકેટ સ્ટેડિયમ ખાતે ભારત અને ન્યૂઝીલેન્ડ વચ્ચે રમાનારી એક દિવસીય આંતરરાષ્ટ્રીય મેચને લઈને સમગ્ર સૌરાષ્ટ્રમાં ક્રિકેટપ્રેમીઓમાં ભારે ઉત્સાહ જોવા મળી રહ્યો છે. મકરસંક્રાંતિના દિવસે જાહેર રજા હોવાના કારણે આ મેચનો ક્રેઝ બેવડો થયો છે. રાજકોટ ઉપરાંત જામનગર, જૂનાગઢ, ભાવનગર, અમરેલી સહિત સમગ્ર સૌરાષ્ટ્રમાંથી ક્રિકેટરસિયાઓ ઉમટી પડશે તેવી શક્યતા વ્યક્ત કરવામાં આવી રહી છે.
 

ટિકિટ વેચાણને મળ્યો જોરદાર પ્રતિસાદ

મેચ માટેની ટિકિટોના વેચાણને શરૂઆતથી જ સારો પ્રતિસાદ મળી રહ્યો છે. ઘણા સ્ટેન્ડની ટિકિટો ઝડપથી વેચાઈ રહી હોવાના સંકેતો મળી રહ્યા છે. જાહેર રજા અને ડે-નાઇટ મેચ હોવાના કારણે સ્ટેડિયમ હાઉસફુલ રહેવાનું લગભગ નિશ્ચિત માનવામાં આવી રહ્યું છે. ક્રિકેટરસિયાઓએ સમય પહેલાં જ ટિકિટ બુકિંગ શરૂ કરી દીધું છે.
 

રોહિત શર્મા અને વિરાટ કોહલી મુખ્ય આકર્ષણ

ભારતીય ક્રિકેટના બે મહાન બેટ્સમેન રોહિત શર્મા અને વિરાટ કોહલી ટેસ્ટ અને ટી-20 ક્રિકેટમાંથી નિવૃત્તિ લઈ ચૂક્યા છે અને હાલમાં માત્ર વન-ડે ફોર્મેટમાં જ રમે છે. આવી સ્થિતિમાં રાજકોટમાં રમાનારી આ મેચ તેમના વન-ડે કારકિર્દીની અંતિમ મેચોમાંથી એક હોઈ શકે છે. આ કારણોસર પણ ક્રિકેટપ્રેમીઓમાં રોહિત-કોહલીને છેલ્લીવાર રમતા જોવા માટે વિશેષ ઉત્સાહ જોવા મળી રહ્યો છે.
 

ભારત–ન્યૂઝીલેન્ડ ટીમો 12મીએ રાજકોટ આવશે

ભારત અને ન્યૂઝીલેન્ડ વચ્ચે ત્રણ વન-ડે મેચોની શ્રેણી રમાઈ રહી છે. શ્રેણીની પ્રથમ મેચ 11 જાન્યુઆરીએ વડોદરામાં યોજાશે. ત્યારબાદ બંને ટીમો 12 જાન્યુઆરીએ વડોદરાથી ખાસ વિમાન દ્વારા રાજકોટ પહોંચશે.
ભારતીય ટીમ શહેરની જાણીતી હોટલ સયાજીમાં રોકાશે, જ્યારે પ્રવાસી ન્યૂઝીલેન્ડ ટીમનું રોકાણ હોટલ ફોર્ચ્યુનમાં રહેશે.
 

13મીએ ફ્લડ લાઇટમાં નેટ પ્રેક્ટિસ

મેચ પૂર્વે 12 જાન્યુઆરીએ બંને ટીમો આરામ કરશે. જ્યારે 13 જાન્યુઆરીએ નેટ પ્રેક્ટિસ યોજાશે.
ન્યૂઝીલેન્ડ ટીમ બપોરે 1.30 થી 4.30 દરમિયાન પ્રેક્ટિસ કરશે, જ્યારે ભારતીય ટીમ સાંજે 5.30 થી રાત્રે 8 વાગ્યા સુધી ફ્લડ લાઇટ હેઠળ નેટ પ્રેક્ટિસ કરશે. શિયાળાની ઋતુમાં વહેલી સાંજ થતા ભારતીય ટીમ રાત્રિ પ્રેક્ટિસ કરશે, જે ડે-નાઇટ મેચ માટે ફાયદાકારક સાબિત થઈ શકે છે.
 

ડે-નાઇટ મેચમાં ભારતીય ટીમને ફાયદાની આશા

14 જાન્યુઆરીની મેચ ડે-નાઇટ રહેશે. ફ્લડ લાઇટ હેઠળ રમવાનો ભારતીય ટીમને સારો અનુભવ હોવાથી હોમ એડવાન્ટેજ મળવાની શક્યતા છે. રાજકોટની પિચ સામાન્ય રીતે બેટ્સમેનને અનુકૂળ રહેતી હોવાથી ઉંચા સ્કોરની અપેક્ષા રાખવામાં આવી રહી છે.
 

ભારતીય ટીમમાં સ્ટાર ખેલાડીઓનું આકર્ષણ

શુભમન ગીલ ભારતીય ટીમના કેપ્ટન તરીકે જવાબદારી સંભાળી રહ્યા છે. તેમની સાથે રોહિત શર્મા, વિરાટ કોહલી, કે.એલ. રાહુલ, ઋષભ પંત સહિતના સ્ટાર ખેલાડીઓ ક્રિકેટપ્રેમીઓ માટે વિશેષ આકર્ષણ રહેશે. આ મેચ યુવા અને અનુભવી ખેલાડીઓના સંયોજનને જોવાની પણ એક સારી તક બનશે.
 

રાજકોટના મેદાન પર પાંચમો વન-ડે

નિરંજન શાહ સ્ટેડિયમમાં અત્યાર સુધી 12 આંતરરાષ્ટ્રીય મેચો રમાઈ છે, જેમાં 3 ટેસ્ટ, 6 ટી-20 અને 4 વન-ડેનો સમાવેશ થાય છે. 14 જાન્યુઆરીએ રમાનારી મેચ રાજકોટના મેદાન પરનો પાંચમો વન-ડે હશે. ખાસ વાત એ છે કે ન્યૂઝીલેન્ડ ટીમ રાજકોટમાં પ્રથમ વખત વન-ડે મેચ રમશે.
 

રાજકોટમાં વન-ડેનો ઈતિહાસ ભારત માટે ચિંતાજનક

રાજકોટના મેદાન પર અત્યાર સુધી રમાયેલા ચાર વન-ડેમાંથી ભારત ત્રણ મેચ હારી ચૂક્યું છે.

• 2013માં ઇંગ્લેન્ડે ભારતને 9 રને હરાવ્યું
• 2015માં દક્ષિણ આફ્રિકાએ 18 રને જીત મેળવી
• 2020માં ભારતે ઓસ્ટ્રેલિયાને 36 રને હરાવ્યું
• 2023માં ઓસ્ટ્રેલિયાએ ભારતને 66 રને પરાજય આપ્યો

આ આંકડાઓ વચ્ચે ભારત આ વખત જીત મેળવી રાજકોટના રેકોર્ડમાં સુધારો કરવા આતુર છે.
 

સમગ્ર શહેરમાં ક્રિકેટમય માહોલ

મેચને લઈને રાજકોટમાં હોટલ, ટ્રાન્સપોર્ટ, ખાણીપીણી અને વેપાર ક્ષેત્રમાં પણ રોનક જોવા મળી રહી છે. મકરસંક્રાંતિના પતંગપર્વ વચ્ચે ક્રિકેટનો ઉત્સાહ શહેરને સંપૂર્ણ ક્રિકેટમય બનાવી દેશે તેવું જણાઈ રહ્યું છે.