રણવીર સિંહ અભિનીત ફિલ્મ ‘ધુરંધર’ બોક્સ ઓફિસ પર ધમાલ મચાવી રહી છે અને દરેક તરફથી પ્રશંસા મેળવી રહી છે, પરંતુ આ ચર્ચાઓ વચ્ચે હૃતિક રોશનની તાજેતરની પ્રતિક્રિયા ખાસ ધ્યાન ખેંચી રહી છે. હૃતિકે ફિલ્મના એક્શન, સ્ટોરીટેલિંગ અને કલાકારોના અભિનયની ખુલ્લેઆમ પ્રશંસા કરી, પરંતુ સાથે જ ફિલ્મના રાજકીય પાસાને લઈને તેણે સવાલ પણ ઉઠાવ્યો છે. આ મિશ્ર પ્રતિક્રિયા સોશિયલ મીડિયા પર વાયરલ બનતા લોકો તેની મજાક પણ ઉડાવી રહ્યા છે અને અનેક મીમ્સ સામે આવ્યા છે.

હૃતિક રોશન, જે પોતાની કારકિર્દીમાં અનેક એક્શન અને પોલિટિકલ થ્રિલર ફિલ્મો કરી ચૂક્યો છે, તે સિનેમાના શૈક્ષણિક પાસાઓને લઈને ખૂબ સંવેદનશીલ માનવામાં આવે છે. ‘ધુરંધર’ જોવા બાદ હૃતિકે પોતાના ઈન્સ્ટાગ્રામ પર લાંબી પોસ્ટ મૂકી હતી, જેમાં તેણે ખાસ કરીને ફિલ્મના ગાઢ પ્લૉટ, રજૂઆત અને સ્ટોરીને આગળ ધપાવવાની ટેકનિકોની પ્રશંસા કરી હતી. હૃતિકે લખ્યું કે, “મને સિનેમા ગમે છે. ખાસ કરીને એવી ફિલ્મો જેમાં નિર્માતાઓ પોતાનું બધું જોખમમાં મૂકી, સ્ટોરીને કાબૂમાં રાખી તેને દર્શકો સામે સંપૂર્ણ શક્તિથી રજૂ કરે છે. ‘ધુરંધર’ તેનું ઉત્તમ ઉદાહરણ છે.”
 

પણ આ વખાણની વચ્ચે તેણે ફિલ્મની રાજકીય દિશા પર અસહમતિ દર્શાવી. હૃતિકે લેખિતમાં જણાવ્યું, “હું ફિલ્મની રાજનીતિ સાથે સંપૂર્ણપણે સહમત થઈ શકતો નથી. એક વિશ્વના નાગરિક તરીકે મને લાગે છે કે ફિલ્મમેકર્સ પાસે ચોક્કસ નૈતિક જવાબદારીઓ હોય છે. શું બતાવવું જોઈએ અને કેવી રીતે બતાવવું જોઈએ તે બાબતે ચર્ચા થવી જોઈએ.” તેની આ ટિપ્પણી વાયરલ થતાં કેટલાક લોકોએ તેને ટ્રોલ કરતા કહ્યું કે હૃતિક ફિલ્મની રાજનીતિ નહીં પરંતુ પોતાના અભિનયના રાજકારણમાં વધુ ગૂંચવાયા છે.

સાથે જ બીજી તરફ ઘણા દર્શકો અને હૃતિકના ચાહકોએ તેની વાતને સમર્થન આપતા કહ્યું કે કોઈ ફિલ્મની ટેકનિકલ સિદ્ધિઓને વખાણવામાં અને સાથે તેની વિચારધારા પર અસહમતિ રાખવામાં કોઈ ખોટ નથી. પરંતુ સોશિયલ મીડિયા પર મજાકનો માહોલ જ વધારે નજરે પડ્યો.

આ પોસ્ટ બાદ હૃતિકે ‘X’ પર બીજી પોસ્ટ શેર કરી, જેમાં તેણે ફિલ્મની સમગ્ર ટીમની વિશેષ પ્રશંસા કરી. તેણે આદિત્ય ધરને “ઝનૂની મેકર” કહેવ્યા, રણવીર સિંહના અભિનયને “શાંતથી લઈને આક્રમક સુધીની અદ્ભુત સફર” ગણાવી. અક્ષય ખન્નાને તેણે ‘ઓલટાઈમ ફેવરિટ પરફોર્મર’ ગણાવ્યા અને આર. માધવનના અભિનયમાં દેખાતી ગ્રેસ અને ડેપ્થની વખાણ કરી.

પણ સૌથી વધુ ચર્ચાસ્પદ બની તેની રાકેશ બેદીને અપાતી પ્રશંસા, જેમાં હૃતિકે લખ્યું, “રાકેશ બેદી, તમે તો ફાડીને રાખી દીધું! અદ્ભુત અભિનય!” આ લાઈન સોશિયલ મીડિયા પર વધુ વાયરલ બની રહી છે.

‘ધુરંધર’ને દર્શકોની સાથે ફિલ્મ સેલિબ્રિટીઝ તરફથી પણ જોરદાર પ્રતિસાદ મળી રહ્યો છે. 250 કરોડના બજેટમાં બનેલી આ ફિલ્મે માત્ર 6 દિવસમાં 265.25 કરોડનું વર્લ્ડવાઈડ કલેક્શન કર્યું છે. માત્ર ભારતમાંથી જ લગભગ 180 કરોડની કમાણી થઈ ગઈ છે, જે ફિલ્મને સુપરહિટની લીસ્ટમાં મજબૂત સ્થાન અપાવે છે.

ફિલ્મની સફળતા પાછળના મુખ્ય કારણોમાં રણવીર સિંહનો પાવરફુલ અભિનય, આદિત્ય ધરનું શાર્પ ડિરેક્ટરશિપ, અક્ષય ખન્નાની મજબૂત હાજરી, તેમજ ફિલ્મની પ્રેઝન્ટેશન શૈલીનો સમાવેશ થાય છે. ત્યાં સુધી કે ફિલ્મનાં મેકઅપ અને પ્રોસ્થેટિક્સ ટીમને પણ હૃતિકે ખાસ કરીને જણાવ્યું કે તેમની મહેનત ફિલ્મને વિશેષ ઊંચાઈ આપે છે.

હૃતિક રોશનની પ્રતિક્રિયાને લઈને ફેન્સમાં મિશ્ર પ્રતિસાદ છે, પરંતુ એક વાત સ્પષ્ટ છે કે ‘ધુરંધર’એ બોલિવૂડમાં ચર્ચા, ક્રેઝ અને કલેક્શન—ત્રણે મોરચે એક મજબૂત છાપ છોડી છે. હૃતિકે અંતમાં લખ્યું કે તે હવે ‘ધુરંધર પાર્ટ 2’ની રાહ જોઈ રહ્યો છે, જે દર્શકોમાં પણ ઉત્સુકતા વધારતું નિવેદન છે.