અમદાવાદ સિવિલ મેડિસીટી ખાતે સ્થિત ઇન્સ્ટિટ્યૂટ ઑફ કિડની ડિસીઝ એન્ડ રીસર્ચ સેન્ટરે વર્ષ 2025 દરમિયાન કિડની પ્રત્યારોપણના ક્ષેત્રમાં એક ઐતિહાસિક સિદ્ધિ હાંસલ કરી છે. ગુજરાત સરકારના આરોગ્ય વિભાગ હેઠળ કાર્યરત આ અગ્રણી સંસ્થાએ માત્ર એક જ વર્ષમાં 500 કિડની ટ્રાન્સપ્લાન્ટ સફળતાપૂર્વક પૂર્ણ કરીને સમગ્ર દેશની જાહેર આરોગ્ય વ્યવસ્થામાં પોતાની આગવી ઓળખ સ્થાપી છે. આ સિદ્ધિ સાથે સંસ્થાએ પબ્લિક હોસ્પિટલની શ્રેણીમાં દેશભરમાં પ્રથમ સ્થાન મેળવી લીધું છે, જે રાજ્ય માટે ગૌરવની બાબત ગણાય છે.

ઇન્સ્ટિટ્યૂટ ઑફ કિડની ડિસીઝ એન્ડ રીસર્ચ સેન્ટર સતત આધુનિક ટેકનોલોજી, અનુભવી તબીબો અને સુવ્યવસ્થિત આરોગ્ય સેવાઓના કારણે કિડની સારવાર ક્ષેત્રે નવા કિર્તિમાન સ્થાપી રહ્યું છે. નવેમ્બર 2024 સુધીમાં સંસ્થાએ કુલ 400 કિડની ટ્રાન્સપ્લાન્ટ કર્યા હતા, જ્યારે વર્ષ 2025માં માત્ર 7 ઓક્ટોબર સુધીમાં જ આ આંકડો ફરી 400 સુધી પહોંચી ગયો હતો. વર્ષના અંત સુધીમાં 500 ટ્રાન્સપ્લાન્ટ પૂર્ણ કરીને સંસ્થાએ એક નોંધપાત્ર રેકોર્ડ પોતાના નામે કર્યો છે.

આ 500 કિડની ટ્રાન્સપ્લાન્ટમાં 367 પુરુષો અને 133 મહિલાઓનો સમાવેશ થાય છે, જે બતાવે છે કે સંસ્થા લિંગભેદ વગર દરેક જરૂરિયાતમંદ દર્દીને સમાન સારવાર ઉપલબ્ધ કરાવી રહી છે. વધુ મહત્વની વાત એ છે કે આ સેવા માત્ર ગુજરાત રાજ્ય પૂરતી મર્યાદિત નથી. કુલ 500 દર્દીઓમાંથી 330 દર્દીઓ ગુજરાતના છે, જ્યારે 170 દર્દીઓ અન્ય રાજ્યોમાંથી આવીને અહીં સારવાર મેળવી છે. આ આંકડાઓ દર્શાવે છે કે અમદાવાદનું કિડની ઇન્સ્ટિટ્યૂટ હવે રાષ્ટ્રીય સ્તરે વિશ્વાસપાત્ર આરોગ્ય કેન્દ્ર બની ગયું છે.

ટેકનોલોજી અને વિશેષ સારવારની દિશામાં પણ સંસ્થાએ નોંધપાત્ર પ્રગતિ કરી છે. વર્ષ 2025 દરમિયાન કરવામાં આવેલા ટ્રાન્સપ્લાન્ટમાં 157 કેડેવર ટ્રાન્સપ્લાન્ટ, 90 સ્વેપ ટ્રાન્સપ્લાન્ટ, 49 પીડિયાટ્રિક એટલે કે બાળકોના ટ્રાન્સપ્લાન્ટ અને 43 રોબોટિક કિડની ટ્રાન્સપ્લાન્ટનો સમાવેશ થાય છે. ખાસ કરીને કેડેવર અને રોબોટિક ટ્રાન્સપ્લાન્ટની સંખ્યામાં થયેલો વધારો અંગદાન અંગે વધતી જાગૃતિ અને આધુનિક સારવાર પદ્ધતિઓના સફળ અમલનો પુરાવો છે.

આ સંસ્થા આર્થિક રીતે નબળા અને છેવાડાના વર્ગના દર્દીઓ માટે પણ આશીર્વાદરૂપ સાબિત થઈ છે. કુલ 500 કિડની ટ્રાન્સપ્લાન્ટમાંથી 318 ઓપરેશન પ્રધાનમંત્રી જન આરોગ્ય યોજના (PM-JAY) અંતર્ગત કરવામાં આવ્યા છે, જેના કારણે ગરીબ અને મધ્યમ વર્ગના દર્દીઓને નિઃશુલ્ક અથવા ઓછા ખર્ચે જીવનરક્ષક સારવાર મળી છે. સરકારની આરોગ્ય યોજનાઓને જમીન પર સફળતાપૂર્વક અમલમાં મૂકવાનો આ ઉત્તમ ઉદાહરણ છે.

આ ઉપરાંત, સ્કૂલ હેલ્થ પ્રોગ્રામ અંતર્ગત 29 ટ્રાન્સપ્લાન્ટ, સામાજિક રીતે પછાત વર્ગ માટે ખાસ યોજના હેઠળ OBC વર્ગના 24, ST વર્ગના 7 દર્દીઓ તેમજ CAPF હેઠળ 4 અને CGHS યોજના હેઠળ 5 ટ્રાન્સપ્લાન્ટ કરીને સંસ્થાએ આરોગ્ય સેવાઓનો વ્યાપ વધુ વિસ્તૃત કર્યો છે. આથી સાબિત થાય છે કે ઇન્સ્ટિટ્યૂટ માત્ર અદ્યતન સારવાર પૂરતી મર્યાદિત નથી, પરંતુ સામાજિક જવાબદારી સાથે આરોગ્ય સેવાઓ પહોંચાડવા માટે પ્રતિબદ્ધ છે.

ઇન્સ્ટિટ્યૂટ ઑફ કિડની ડિસીઝ એન્ડ રીસર્ચ સેન્ટરની આ ઐતિહાસિક સિદ્ધિ પાછળ તબીબો, નર્સિંગ સ્ટાફ, ટેકનિકલ ટીમ, ટ્રાન્સપ્લાન્ટ કો-ઓર્ડિનેટર્સ તેમજ આરોગ્ય વિભાગના સંયુક્ત પ્રયાસો મહત્વપૂર્ણ રહ્યા છે. રાજ્ય સરકારના માર્ગદર્શન અને સુદ્રઢ આરોગ્ય નીતિઓના કારણે આજે ગુજરાત કિડની ટ્રાન્સપ્લાન્ટના ક્ષેત્રમાં દેશ માટે માર્ગદર્શક બની રહ્યું છે.

એક જ વર્ષમાં 500 કિડની ટ્રાન્સપ્લાન્ટ જેવી અદભુત સિદ્ધિ માત્ર આંકડો નથી, પરંતુ તે હજારો પરિવારોને મળેલું નવું જીવન, નવી આશા અને ભવિષ્યની નવી શરૂઆતનું પ્રતીક છે.