રાજકોટ,

સારવાર અર્થે આવેલી અસહાય વ્યક્તિ સાથે તબીબો દ્વારા અશોભનીય વ્યવહારથી રોષ

રાજકોટ સહિત સમગ્ર સૌરાષ્ટ્રની પ્રજા માટે આરોગ્યની આશાનું કેન્દ્ર ગણાતી સિવિલ હોસ્પિટલ ફરી એકવાર વિવાદોના ઘેરાવામાં આવી છે. હોસ્પિટલ પરિસરમાં ફરજ બજાવતા નવ નિયુક્ત (નવા નિમણૂક પામેલા) કેટલાક ડોક્ટરોની બેજવાબદાર અને ઉદ્ધતાઈભરી કાર્યશૈલીના કારણે દર્દીઓ અને તેમના સ્વજનોએ ભારે હાલાકીનો સામનો કરવો પડ્યો હોવાની ઘટના પ્રકાશમાં આવી છે. તાજેતરમાં બનેલી આ ઘટનામાં નવા ડોક્ટરો દ્વારા સારવાર અર્થે આવેલા એક દર્દી સાથે અત્યંત ગેરવર્તન કરવામાં આવ્યું હોવાનું સામે આવ્યું છે.

પ્રાપ્ત વિગતો અનુસાર, સિવિલ હોસ્પિટલમાં દર્દીને કટોકટીના સમયે યોગ્ય અને સત્વરે સારવાર પૂરી પાડવાને બદલે નવા નિમણૂક પામેલા તબીબોએ દર્દી અને તેના પરિવારજનો સાથે અયોગ્ય ભાષા અને શિસ્તહીન વર્તન કર્યું હતું. આ મામલે જ્યારે તાત્કાલિક ધોરણે હોસ્પિટલના જવાબદાર આર.એમ.ઓ. (રેસિડેન્ટ મેડિકલ ઓફિસર) નો સંપર્ક કરી સમગ્ર પરિસ્થિતિથી વાકેફ કરવામાં આવ્યા અને ગેરવર્તન સામે પગલાં લેવાની માંગ કરવામાં આવી, ત્યારે આર.એમ.ઓ. દ્વારા પણ કોઈ સંતોષકારક કે સબળ રિસ્પોન્સ આપવામાં આવ્યો ન હતો. ઉચ્ચ અધિકારી તરફથી જ યોગ્ય સહકાર કે પ્રત્યુત્તર ન સાંપડતા તબીબી આલમમાં અને દર્દીઓમાં ભારે રોષની લાગણી ફેલાઈ ગઈ છે.

દર્દીઓની સેવા અને સુરક્ષા માટે નિમાયેલા તબીબો જ જો અસંવેદનશીલ બને અને હોસ્પિટલના ઉચ્ચ અધિકારીઓ પણ આવી ગંભીર બાબતો પ્રત્યે આંખ આડા કાન કરે, તો સામાન્ય જનતાએ જવું ક્યાં? તે મોટો પ્રશ્ન બન્યો છે. હોસ્પિટલમાં આવતા ગરીબ અને અસહાય દર્દીઓ સાથે થતી આવી ગેરવર્તણૂક અને વહીવટી લાપરવાહી સામે અગાઉ પણ અનેક ફરિયાદો ઊઠી ચૂકી છે, છતાં તંત્ર દ્વારા કોઈ નક્કર પગલાં ન લેવાતા હોવાથી હોસ્પિટલની છબી ખરડાઈ રહી છે.

જવાબદાર અધિકારીઓ દ્વારા યોગ્ય રિસ્પોન્સ ન મળતાં સિવિલની વહીવટી વ્યવસ્થા સામે ગંભીર સવાલો

આ ગંભીર ઘટના બાદ સ્થાનિક જાગૃત નાગરિકો અને દર્દીઓના સગા-સંબંધીઓ દ્વારા માંગ કરવામાં આવી છે કે, સિવિલ હોસ્પિટલના ઉપરી અધિકારીઓ દ્વારા આ મામલે તાત્કાલિક ઉચ્ચ સ્તરીય તપાસ હાથ ધરવામાં આવે અને દર્દીઓ સાથે ગેરવર્તન કરનાર તબીબો તેમજ બેજવાબદાર વલણ દાખવનાર આર.એમ.ઓ. સામે કડક શિસ્તભંગના પગલાં લેવામાં આવે, જેથી ભવિષ્યમાં આવી અમાનવીય ઘટનાઓનું પુનરાવર્તન ન થાય.