ઉત્તર ભારતના હવામાનમાં અચાનક અને મોટો પલટો આવ્યો છે. પશ્ચિમી વિક્ષોભ (વેસ્ટર્ન ડિસ્ટર્બન્સ) સક્રિય થતાં જમ્મુ-કાશ્મીરથી લઈ હિમાચલ પ્રદેશ સુધી ભારે હિમવર્ષા અને તોફાની પવન ફૂંકાઈ રહ્યા છે. પહાડી વિસ્તારોમાં બરફવર્ષા જ્યારે મેદાની વિસ્તારોમાં વરસાદ અને આંધી-તોફાનનો માહોલ સર્જાયો છે. ભારતીય હવામાન વિભાગ (IMD) દ્વારા આગામી 24 કલાક માટે ઓરેન્જ અને યલો એલર્ટ જાહેર કરવામાં આવ્યું છે.

હિમાચલ પ્રદેશના લોકપ્રિય પર્યટન સ્થળ મનાલીમાં સિઝનની પ્રથમ હિમવર્ષા થતાં પ્રવાસીઓમાં ઉત્સાહ જોવા મળ્યો છે. વહેલી સવારથી જ મનાલી શહેર સફેદ ચાદરથી ઢંકાઈ ગયું હતું. અંદાજે બે ઇંચ જેટલો બરફ પડ્યો છે. લાંબા સમયથી હિમવર્ષાની રાહ જોતા પ્રવાસીઓ માટે આ ખુશીની વાત બની છે. હાલ મનાલી શહેરમાં અને નેશનલ હાઈવે પર વાહનવ્યવહાર સામાન્ય છે, જોકે તંત્ર સતર્ક છે. હવામાન વિભાગે શિમલા, કુફરી અને નારકંડા સહિતના વિસ્તારોમાં પણ હિમવર્ષાની શક્યતા વ્યક્ત કરી છે.

બીજી તરફ, કાશ્મીર ખીણમાં સતત થઈ રહેલી ભારે હિમવર્ષાએ જનજીવન અસ્તવ્યસ્ત કર્યું છે. શ્રીનગર ઇન્ટરનેશનલ એરપોર્ટ પર ઓછી દૃશ્યતા અને રનવે પર બરફ જામી જવાને કારણે અત્યાર સુધીમાં 26 ફ્લાઇટ્સ રદ કરવામાં આવી છે. અનેક મુસાફરો એરપોર્ટ પર અટવાયા છે. ઇન્ડિગો અને સ્પાઈસજેટ જેવી એરલાઈન્સે મુસાફરોને મુસાફરી કરતા પહેલા ફ્લાઇટ સ્ટેટસ ચકાસવાની અપીલ કરી છે. હવાઈ સેવાઓ ખોરવાતા પ્રવાસીઓ તેમજ સ્થાનિક નાગરિકોને મુશ્કેલીઓનો સામનો કરવો પડી રહ્યો છે.

હિમવર્ષાની અસરથી કાશ્મીરના અનેક વિસ્તારોમાં રસ્તાઓ બંધ થઈ ગયા છે. મહત્વના માર્ગો પર બરફ જામી જતાં વાહનવ્યવહાર ઠપ થયો છે. સ્થાનિક પ્રશાસન દ્વારા બરફ હટાવવાની કામગીરી યુદ્ધસ્તરે શરૂ કરવામાં આવી છે. શાળાઓમાં રજા જાહેર કરવાની પણ સંભાવના વ્યક્ત કરવામાં આવી છે.

પશ્ચિમી વિક્ષોભની અસર માત્ર પહાડી વિસ્તારો પૂરતી સીમિત નથી. દિલ્હી-NCR, હરિયાણા, રાજસ્થાન અને ઉત્તર પ્રદેશમાં પણ હળવા વરસાદ સાથે તેજ પવન ફૂંકાવાની આગાહી કરવામાં આવી છે. દિલ્હીમાં પવનની ગતિ 30થી 60 કિમી પ્રતિ કલાક સુધી પહોંચી શકે છે, જેના કારણે ઠંડીમાં વધારો નોંધાઈ શકે છે. વહેલી સવારે ધુમ્મસ અને વરસાદી વાતાવરણને કારણે વાહનચાલકોને સાવચેતી રાખવાની સૂચના આપવામાં આવી છે.

ગુજરાતમાં પણ હવામાન પર આ બદલાવની અસર જોવા મળી શકે છે. પવનની દિશા બદલાતા ઠંડીના જોરમાં આંશિક વધારો કે ઘટાડો નોંધાઈ શકે છે. કેટલાક વિસ્તારોમાં વહેલી સવાર અને રાત્રિના સમયે ઠંડી વધુ અનુભવાઈ શકે છે.

હવામાન વિભાગે હિમાચલ પ્રદેશ માટે ખાસ ચેતવણી જાહેર કરી છે. લાહૌલ-સ્પીતિ, ચંબા અને કુલ્લુ જિલ્લામાં ઓરેન્જ એલર્ટ જાહેર કરવામાં આવ્યું છે, જ્યાં ભારે હિમવર્ષા સાથે 50 કિમી પ્રતિ કલાકની ઝડપે પવન ફૂંકાવાની શક્યતા છે. જ્યારે મંડી, કાંગડા, હમીરપુર અને સોલન જિલ્લામાં યલો એલર્ટ જાહેર કરવામાં આવ્યું છે, જ્યાં વરસાદ અને કરા પડવાની શક્યતા છે.

આ ઉપરાંત, હવામાન વિભાગે 26 અને 27 જાન્યુઆરીએ ફરી એકવાર ભારે હિમવર્ષા અને વરસાદની આગાહી કરી છે. અટલ ટનલ, સિસુ સહિત હિમાચલના ઊંચાઈ વાળા વિસ્તારોમાં પહેલાથી જ બરફ પડી રહ્યો છે, હવે મુખ્ય શહેરોમાં પણ હિમવર્ષા શરૂ થતાં પ્રવાસન ઉદ્યોગમાં તેજી આવવાની આશા વ્યક્ત કરવામાં આવી છે.

પ્રશાસન દ્વારા પ્રવાસીઓ અને સ્થાનિક નાગરિકોને અનાવશ્યક મુસાફરી ટાળવા અને હવામાનની તાજી માહિતી પર નજર રાખવા અપીલ કરવામાં આવી છે.