પ્રધાનમંત્રી નરેન્દ્ર મોદી 11 અને 12 નવેમ્બરના રોજ ભૂટાનની બે દિવસીય રાજકીય મુલાકાતે છે. આ તેમની 2014 પછીની ચોથી ભૂટાન યાત્રા છે. આ પ્રવાસનો મુખ્ય હેતુ ભારત અને ભૂટાન વચ્ચેની દોસ્તી અને સહકારને વધુ મજબૂત બનાવવાનો છે. આ સાથે, તેઓ વિશ્વ શાંતિ અને માનવતાના ઉત્થાન માટે આયોજિત **‘ગ્લોબલ પીસ પ્રેયર ફેસ્ટિવલ’**માં પણ ભાગ લેશે.

આ મુલાકાત દરમિયાન, પીએમ મોદી ભૂટાનના રાજા જિગ્મે ખેસર નામગ્યાલ વાંગચુક તથા વડાપ્રધાન ત્સેરિંગ ટોબગે સાથે ઉચ્ચસ્તરીય વાટાઘાટો કરશે. આ બેઠકમાં ઊર્જા, રેલવે, માર્ગ કનેક્ટિવિટી અને વેપાર જેવા ક્ષેત્રોમાં સહયોગ વધારવા પર ભાર મુકવામાં આવશે.

મોદી અને ભૂટાનના રાજા સંયુક્ત રીતે 1020 મેગાવોટની પુનાત્સાંગછૂ-II જળવિદ્યુત પરિયોજનાનું ઉદ્ઘાટન કરશે. આ પ્રોજેક્ટ બંને દેશોના ઊર્જા સહયોગમાં મહત્વપૂર્ણ પગલું ગણાશે. ભારત અને ભૂટાન વચ્ચેની હાઇડ્રો પાવર ભાગીદારી છેલ્લા કેટલાય વર્ષોથી સફળતાપૂર્વક આગળ વધી રહી છે, અને આ ઉદ્ઘાટન તેની નવી સિદ્ધિ ગણાશે.

આ સાથે, વડાપ્રધાન મોદી થિમ્ફુના તાશીછોજોગ મઠ ખાતે ભગવાન બુદ્ધના પવિત્ર પીપરહવા અવશેષોના દર્શન અને પૂજા પણ કરશે. આ અવશેષો ભારતમાં લાવવામાં આવ્યા હતા અને હવે ભૂટાનના લોકો માટે દર્શનાર્થે રાખવામાં આવ્યા છે.

ભૂટાનની મુલાકાત દરમિયાન પીએમ મોદી ભૂટાનના ચોથા રાજાના જન્મદિવસ સમારોહમાં પણ ભાગ લેશે અને વિશ્વ શાંતિ પ્રાર્થના સમારોહમાં ઉપસ્થિત રહી વિશ્વને શાંતિ અને સહઅસ્તિત્વનો સંદેશ આપશે.

વિદેશ મંત્રાલયના જણાવ્યા મુજબ, આ પ્રવાસ ભારત-ભૂટાન સંબંધોને નવી દિશા આપશે. બંને દેશો વચ્ચે વિશ્વાસ, પરસ્પર આદર અને મિત્રતાના આધારે બનેલી ભાગીદારી સમય સાથે વધુ મજબૂત બની રહી છે.

હિમાલયના આ નાના પરંતુ વ્યૂહાત્મક રીતે મહત્વપૂર્ણ દેશ ભૂટાનને ભારત માટે “સુરક્ષા કવચ” માનવામાં આવે છે. ચીન સાથેની સરહદને ધ્યાનમાં લેતા ભૂટાન ભારત માટે બફર ઝોન તરીકે કાર્ય કરે છે. વર્ષ 2017ના ડોકલામ વિવાદ દરમિયાન ભારતે ભૂટાનનો ખમતીપૂર્વક સમર્થન આપ્યું હતું, જે બંને દેશોની દોસ્તીનું પ્રતિક છે.