આખરે વિશ્વપ્રસિદ્ધ દિગ્દર્શક જેમ્સ કેમરોનની મોસ્ટ અવેઈટેડ ફિલ્મ ‘અવતાર: ફાયર એન્ડ એશ’ થિયેટરોમાં રિલીઝ થઈ ગઈ છે. નાવી જાતિ અને પાંડોરાની અજાયબીભરી દુનિયા ફરી એકવાર મોટા પડદા પર પરત આવી છે, જેની દર્શકો લાંબા સમયથી આતુરતાથી રાહ જોઈ રહ્યા હતા. ફિલ્મ રિલીઝ પહેલા જ સોશિયલ મીડિયા પર તેની ભારે ચર્ચા હતી અને હવે રિલીઝ બાદ દર્શકોની પ્રતિક્રિયાઓ પણ ઝડપથી સામે આવી રહી છે.

‘અવતાર: ફાયર એન્ડ એશ’ને લઈને દર્શકોમાં મિશ્ર પ્રતિસાદ જોવા મળી રહ્યો છે. જ્યાં એક તરફ ફિલ્મના વિઝ્યુઅલ ઇફેક્ટ્સ અને સિનેમેટિક અનુભવને લઈને ભારે પ્રશંસા થઈ રહી છે, ત્યાં બીજી તરફ તેની વાર્તાને લઈને કેટલાક દર્શકો નિરાશ પણ થયા છે.
 

સિનેમેટોગ્રાફી અને વિઝ્યુઅલ ઇફેક્ટ્સે દિલ જીતી લીધાં

ફિલ્મની સૌથી મોટી તાકાત તેની સિનેમેટોગ્રાફી અને વિઝ્યુઅલ ઇફેક્ટ્સ (VFX/CGI) છે. દર્શકોના મતે, ‘અવતાર: ફાયર એન્ડ એશ’ એક દૃશ્યાત્મક માસ્ટરપીસ છે. સોશિયલ મીડિયા પર એક યુઝરે લખ્યું છે કે, “આંખ મીંચવાની તમને તક જ નહીં મળે. દરેક ફ્રેમ વૉલપેપર જેવી છે.”

ઘણા દર્શકોએ ફિલ્મને “જીવનભર એક વખત તો મોટા સ્ક્રીન પર જોવાની અનુભવાત્મક ફિલ્મ” ગણાવી છે. ખાસ કરીને IMAX 3D ફોર્મેટમાં ફિલ્મ જોવાની ભલામણ કરવામાં આવી રહી છે. ફિલ્મનું બેકગ્રાઉન્ડ મ્યુઝિક (BGM) પણ દર્શકોને ગુસબમ્પ્સ આપતું હોવાનું કહેવામાં આવ્યું છે.

એક અન્ય યુઝરે ટ્વીટ કરીને લખ્યું, “જેમ્સ કેમરોન ફરી એકવાર અજાયબીઓ કરી બતાવી છે. અવતાર 3 સિનેમેટિક માસ્ટરપીસ છે.”
 

વાર્તાને લઈને મતભેદ

જ્યાં વિઝ્યુઅલ્સ માટે સર્વસંમતિથી પ્રશંસા થઈ રહી છે, ત્યાં ફિલ્મની વાર્તાને લઈને અભિપ્રાયો વહેંચાયેલા છે. ઘણા દર્શકોને લાગ્યું કે ફિલ્મ દેખાવમાં ભવ્ય છે, પરંતુ વાર્તામાં કંઈ ખાસ નવીનતા નથી. કેટલાક દ્રશ્યો પુનરાવર્તિત અને અનુમાનિત લાગ્યા હોવાની પણ ટીકાઓ સામે આવી છે.

એક યુઝરે નિરાશા વ્યક્ત કરતાં લખ્યું, “મને કહેવામાં દુઃખ થાય છે કે ફિલ્મે મને નિરાશ કર્યો. તે ખૂબ સુંદર છે, પરંતુ તેના મોટા ભાગના સંઘર્ષોને ઉકેલવામાં નિષ્ફળ જાય છે.” ખાસ કરીને જેક સુલી અને લોકના પાત્રોને પૂરતું ન્યાય ન મળ્યો હોવાનો અભિપ્રાય પણ કેટલાક દર્શકોએ વ્યક્ત કર્યો છે.

તેમ છતાં, ઘણા ચાહકો માને છે કે ‘અવતાર’ ફ્રેન્ચાઈઝીનો મુખ્ય આકર્ષણ હંમેશા તેની દુનિયા, દ્રશ્યો અને લાગણીઓ રહ્યા છે, અને એ મામલે ‘ફાયર એન્ડ એશ’ સંપૂર્ણ રીતે સફળ થાય છે.
 

ભાવનાઓ, આગ અને સંઘર્ષનો નવો અધ્યાય

આ ફિલ્મમાં દર્શકોને બળતરા, ગુસ્સો અને તીવ્ર લાગણીઓનો અનુભવ થતો હોવાનું કહેવામાં આવી રહ્યું છે. ‘ફાયર એન્ડ એશ’માં નવી જાતિ મંગકવાન પર આધારિત વાર્તા રજૂ કરવામાં આવી છે, જેમાં જેક સુલી અને તેના પરિવારને એક નવા, ખતરનાક દુશ્મનનો સામનો કરવો પડે છે. આ નવો અધ્યાય પાંડોરાની દુનિયાને વધુ અંધકારમય અને તીવ્ર બનાવે છે.
 

કલાકારો અને ટીમ

‘અવતાર: ફાયર એન્ડ એશ’માં સેમ વર્લિંગ્ટન, ઝો સાલ્ડાના, સિગૉર્ની વીવર, કેટ વિન્સલેટ, ક્લિફ કર્ટિસ અને સ્ટીફન લેંગ મુખ્ય ભૂમિકામાં છે. ફિલ્મનું દિગ્દર્શન જેમ્સ કેમરોન દ્વારા કરવામાં આવ્યું છે, જ્યારે સ્ક્રિપ્ટ જેમ્સ કેમરોન, રિક જાફા અને અમાન્ડા સિલ્વર દ્વારા સહ-લખવામાં આવી છે.

ઉલ્લેખનીય છે કે ‘અવતાર’નો પહેલો ભાગ 2009માં અને ‘અવતાર: ધ વે ઓફ વોટર’ 2022માં રિલીઝ થયો હતો. ‘ફાયર એન્ડ એશ’ આ શ્રેણીનો ત્રીજો ભાગ છે, જે ટેકનિકલ રીતે ફ્રેન્ચાઈઝીને નવા ઊંચાઈએ લઈ જાય છે.

કુલ મળીને ‘અવતાર: ફાયર એન્ડ એશ’ એક શાનદાર સિનેમેટિક અનુભવ છે, જે ખાસ કરીને વિઝ્યુઅલ્સ અને ટેક્નોલોજી માટે યાદ રહેશે. જો તમે વાર્તામાં નવીનતા કરતા દૃશ્યાત્મક ભવ્યતાને વધુ મહત્વ આપો છો, તો આ ફિલ્મ તમારા માટે ચોક્કસ જોવા જેવી છે.