ભારતના પ્રધાનમંત્રી શ્રી નરેન્દ્રભાઈ મોદીના ‘ટી.બી. મુક્ત ભારત’ અભિયાનને સાકાર કરવાની દિશામાં રાજકોટ જિલ્લામાં માનવતાભર્યા અને સમાજહિતના પ્રયાસો સતત આગળ વધી રહ્યા છે. આ અભિયાનને વધુ વેગ આપવા માટે ‘એક કદમ માનવતા કી ઓર’ના સૂત્ર સાથે રાજકોટ જિલ્લા ક્ષય કેન્દ્ર દ્વારા લાયન્સ ક્લબ ઓફ રાજકોટ પ્રાઈડના સહયોગથી પોષણ કિટ વિતરણ કાર્યક્રમનું આયોજન કરવામાં આવ્યું હતું. ગત તા. 22 જાન્યુઆરીના રોજ આયોજિત આ કાર્યક્રમમાં શાપર ઇન્ડસ્ટ્રિયલ વિસ્તારના ટી.બી.થી પીડિત 30 જેટલા જરૂરિયાતમંદ દર્દીઓને નિક્ષય મિત્ર બની પૌષ્ટિક આહાર કિટનું વિતરણ કરવામાં આવ્યું હતું.

આ કાર્યક્રમમાં ધારાસભ્ય શ્રી રમેશભાઈ ટીલાળાના હસ્તે પોષણ કિટનું વિતરણ કરવામાં આવ્યું હતું. આ પ્રસંગે ધારાસભ્યશ્રીએ દર્દીઓને સંબોધતા જણાવ્યું હતું કે ટી.બી. એક ગંભીર પરંતુ સંપૂર્ણપણે સારવારથી સાજો થતો રોગ છે. જો દર્દીઓ નિયમિત દવાઓ લે, યોગ્ય પૌષ્ટિક આહાર અપનાવે અને મક્કમ મનોબળ સાથે સારવાર પ્રક્રિયામાં જોડાય તો ટી.બી.ને હરાવવું અશક્ય નથી. તેમણે દર્દીઓને હિંમત ન હારવા અને સંપૂર્ણ આરોગ્ય પ્રાપ્ત થાય ત્યાં સુધી સારવાર ચાલુ રાખવા માટે પ્રોત્સાહિત કર્યા હતા.

કાર્યક્રમ દરમિયાન લાયન્સ ક્લબના પોરબંદર જિલ્લાના અધ્યક્ષ શ્રી નિધિબેન મોઢવાડિયા પણ ઉપસ્થિત રહ્યા હતા. તેઓ પોતે ‘ટી.બી. ચેમ્પિયન’ હોવાના કારણે તેમણે દર્દીઓ સાથે પોતાના જીવનના અનુભવો વહેંચ્યા હતા. પોતાના અનુભવ દ્વારા તેમણે દર્દીઓને સમજાવ્યું હતું કે યોગ્ય સારવાર અને આત્મવિશ્વાસથી ટી.બી.ને હરાવી શકાય છે. તેમના પ્રેરણાદાયક શબ્દોથી દર્દીઓમાં આત્મવિશ્વાસ અને નવી આશાનું સંચાર થયું હતું.
 

કાર્યક્રમ દરમિયાન ‘ટી.બી. હારેગા, દેશ જીતેગા’ના સૂત્રોચ્ચાર સાથે ઉપસ્થિત સૌએ એકસાથે ભારતને ટી.બી. મુક્ત બનાવવાનો સંકલ્પ લીધો હતો. લાયન્સ ક્લબના આગેવાનોએ દર્દીઓને દવાની સાથેસાથે પૌષ્ટિક આહાર લેવાની મહત્વતા પર વિશેષ ભાર મૂક્યો હતો. તેમણે જણાવ્યું હતું કે માત્ર દવાઓથી જ નહીં પરંતુ સંતુલિત અને પોષણયુક્ત આહારથી શરીરની રોગપ્રતિકારક શક્તિ વધે છે, જે ટી.બી. જેવી બીમારી સામે લડવામાં મહત્વની ભૂમિકા ભજવે છે.

ઉલ્લેખનીય છે કે વિતરણ કરાયેલ પોષણ કિટમાં મગ, ચણા, મઠ, સોયાબીન, રાજમા, પંચરત્ન દાળ, મગદાળ, ચણાદાળ, તુવેરદાળ, ચોળા, ચોખા, સીંગદાણા, ખજૂર, ગોળ અને દાળિયા જેવા પૌષ્ટિક ધાન્યનો સમાવેશ કરવામાં આવ્યો હતો. આ તમામ ખાદ્ય પદાર્થો દર્દીઓના દૈનિક પોષણમાં વધારો કરે અને તેમની તંદુરસ્તી સુધારવામાં સહાયરૂપ બને તે હેતુથી પસંદ કરવામાં આવ્યા હતા.

આ તકે રાજકોટ જિલ્લા ક્ષય કેન્દ્રના અધિકારીઓ અને સ્ટાફ દ્વારા પણ ટી.બી. અંગે જનજાગૃતિ ફેલાવવા પર ભાર મૂકવામાં આવ્યો હતો. સ્ટાફે હાજર લોકોને ‘ક્ષયમુક્ત ભારત’ના સેવાયજ્ઞમાં જોડાવા માટે અપીલ કરી હતી. તેમણે જણાવ્યું હતું કે સમાજના વધુને વધુ લોકો નિક્ષય મિત્ર બની ટી.બી.ના દર્દીઓને પોષણ કિટ અને માનસિક સહારો પૂરો પાડે તો દેશમાંથી ટી.બી.ને સંપૂર્ણપણે નાબૂદ કરવાનું લક્ષ્ય ઝડપથી પ્રાપ્ત કરી શકાય.

કાર્યક્રમ દરમિયાન દર્દીઓને નિયમિત દવાઓ લેવાની, સમયસર આરોગ્ય તપાસ કરાવવાની અને કોઈપણ પ્રકારની મુશ્કેલી હોય તો આરોગ્ય કેન્દ્રનો સંપર્ક કરવા અંગે માર્ગદર્શન આપવામાં આવ્યું હતું. સાથે સાથે ટી.બી. અંગેના ભ્રમો દૂર કરવા અને સમાજમાં દર્દીઓ પ્રત્યે સહાનુભૂતિ અને સહકારની ભાવના વિકસે તે માટે પણ ચર્ચા કરવામાં આવી હતી.

આ કાર્યક્રમ માત્ર પોષણ કિટના વિતરણ પૂરતો સીમિત ન રહી, પરંતુ તે માનવતા, સહકાર અને સામૂહિક જવાબદારીનો સંદેશ આપતો સાબિત થયો. રાજકોટ જિલ્લામાં આવા પ્રયાસો દ્વારા એક તરફ ટી.બી.ગ્રસ્ત દર્દીઓને પોષણ અને પ્રોત્સાહન મળી રહ્યું છે, તો બીજી તરફ સમાજને પણ આરોગ્યપ્રત્યે વધુ જાગૃત બનાવવાનો પ્રયાસ થઈ રહ્યો છે. સરકાર, સ્વૈચ્છિક સંસ્થાઓ અને સમાજની સંયુક્ત ભાગીદારીથી ‘ટી.બી. મુક્ત ભારત’નું સ્વપ્ન નિશ્ચિત રૂપે સાકાર થશે એવી આશા વ્યક્ત કરવામાં આવી હતી.