સાઉથ ઈન્ડિયન સિનેમાના સૌથી લોકપ્રિય અને પ્રભાવશાળી અભિનેતા થલાપતિ વિજયે પોતાના ફિલ્મી કરિયરને અલવિદા કહીને ચાહકોને ભાવુક કરી દીધા છે. વર્ષોથી પોતાની ફિલ્મો અને સ્ટાઇલથી કરોડો દિલ પર રાજ કરનારા વિજય હવે અભિનયથી દૂર જઈ રાજનીતિમાં સંપૂર્ણ રીતે પ્રવેશ કરવાની તૈયારીમાં છે. તેમની છેલ્લી ફિલ્મ ‘જન નાયકન’ રહેશે, જે 9 જાન્યુઆરી, 2026ના રોજ રિલીઝ થવાની છે.

આ નિર્ણયની જાહેરાત વિજયે મલેશિયામાં યોજાયેલા ‘જન નાયકન’ ફિલ્મના ભવ્ય ઓડિયો લોન્ચ ઈવેન્ટ દરમિયાન કરી હતી. 27 ડિસેમ્બર, 2025ના રોજ યોજાયેલી આ ઇવેન્ટમાં થલાપતિ વિજય ભાવુક બની ગયા હતા. મંચ પર બોલતાં તેમણે કહ્યું હતું, “મને ખબર નથી કે મારે આ વાત કહેવી જોઈએ કે નહીં, પરંતુ મારી અંતિમ ફિલ્મ થોડી દર્દનાક છે… ખરું ને? તમે મને શું કરવા માગો છો?” વિજયના આ શબ્દોએ ત્યાં હાજર ફેન્સને ભાવુક કરી દીધા હતા અને સમગ્ર હોલ ‘થલાપતિ’ના નારાઓથી ગુંજી ઉઠ્યો હતો.
 

એક્ટિંગને અલવિદા, રાજનીતિને આવકાર

થલાપતિ વિજયે અભિનય કરિયર છોડવાનો નિર્ણય લઈને હવે સંપૂર્ણપણે રાજનીતિ પર ધ્યાન કેન્દ્રિત કરવાનો સંકલ્પ કર્યો છે. ગયા વર્ષે તેમણે ‘તમિલગા વેટ્ટી કઝગમ’ નામે પોતાનો રાજકીય પક્ષ શરૂ કર્યો હતો. મળતી માહિતી મુજબ, વિજય આગામી તમિલનાડુ વિધાનસભાની ચૂંટણી લડવાની તૈયારીમાં છે. તેમના ચાહકો માટે આ એક મોટો બદલાવ છે, કારણ કે વર્ષોથી તેઓ વિજયને માત્ર સિલ્વર સ્ક્રીન પર જ નહીં, પરંતુ પોતાના જીવનના હીરો તરીકે જોતા આવ્યા છે.
 

ઇવેન્ટ દરમિયાન વિજયે પોતાના નિર્ણય અંગે ખુલ્લા દિલે વાત કરી હતી. તેમણે કહ્યું, “મારા માટે એક જ વાત મહત્વની છે – લોકો સિનેમાઘરોમાં આવીને મને જોઈને ઊભા થાય. એ પ્રેમ માટે હું હંમેશા આભારી છું. હવે આગામી 30થી 33 વર્ષ સુધી હું આ જ લોકો માટે, તેમની ભલાઈ માટે ખડેપગે રહેવા તૈયાર છું.” વિજયના આ શબ્દોમાંથી સ્પષ્ટ થાય છે કે તેઓ પોતાના ચાહકોને સિનેમા પછી રાજનીતિમાં પણ નિરાશ નહીં કરે.
 

સંઘર્ષથી સફળતા સુધીની યાત્રા

થલાપતિ વિજયે પોતાના ફિલ્મી સફર વિશે પણ ભાવુક યાદો શેર કરી હતી. તેમણે કહ્યું, “મને પહેલા દિવસથી જ દરેક પ્રકારની ટીકાનો સામનો કરવો પડ્યો છે. પરંતુ મારા ફેન્સ શરૂઆતથી જ મારી સાથે અડીખમ ઊભા રહ્યા છે. મેં એક્ટિંગમાં એક નાનું રેતીનું મકાન બનાવવાની આશા સાથે પગલું ભર્યું હતું, પરંતુ લોકોએ મને મહેલ આપ્યો.”

વિજયના આ શબ્દો તેમની વિનમ્રતા અને ચાહકો પ્રત્યેના આદરને દર્શાવે છે. વર્ષો સુધી સુપરહિટ ફિલ્મો આપીને તેમણે સાબિત કર્યું છે કે તેઓ માત્ર સ્ટાર નહીં, પરંતુ જનનાયક છે.
 

‘જન નાયકન’ હશે અંતિમ પડાવ

થલાપતિ વિજયની છેલ્લી ફિલ્મ ‘જન નાયકન’ને લઈને ફેન્સમાં ભારે ઉત્સાહ જોવા મળી રહ્યો છે. આ ફિલ્મનું નિર્દેશન જાણીતા ડાયરેક્ટર એચ. વિનોદે કર્યું છે. ફિલ્મમાં વિજય સાથે બોબી દેઓલ, પૂજા હેગડે, મમિતા બેઝુ, ગૌતમ વાસુદેવ મેનન, પ્રકાશ રાજ, નારાયણ અને પ્રિયામણિ જેવા દિગ્ગજ કલાકારો મહત્વપૂર્ણ ભૂમિકામાં જોવા મળશે.

ફિલ્મના ટાઇટલ અને કથાવસ્તુને જોતા એવું માનવામાં આવી રહ્યું છે કે ‘જન નાયકન’ વિજયની છબી અને જીવનના આગામી અધ્યાય સાથે ઊંડો સંબંધ ધરાવે છે. એટલે જ વિજયે આ ફિલ્મને પોતાની અંતિમ ફિલ્મ કહીને ‘દર્દનાક’ ગણાવી છે.
 

ફેન્સ માટે ભાવુક ક્ષણ

થલાપતિ વિજયનું એક્ટિંગ કરિયરને અલવિદા કહેવું ફેન્સ માટે સરળ નથી. સોશિયલ મીડિયા પર તેમના નિવેદનના વીડિયો વાયરલ થઈ રહ્યા છે અને ચાહકો ભાવુક સંદેશાઓ પોસ્ટ કરી રહ્યા છે. કોઈ તેમને ‘સિનેમાનો રાજા’ કહે છે તો કોઈ ‘ભવિષ્યનો રાજકીય નેતા’.

નિઃસંદેહ, થલાપતિ વિજયનું સિનેમાથી રાજનીતિ સુધીનું સફર તમિલનાડુના ઈતિહાસમાં એક મહત્વપૂર્ણ અધ્યાય બનવાનું છે. હવે તમામની નજર 9 જાન્યુઆરી, 2026ના રોજ રિલીઝ થનારી ‘જન નાયકન’ પર ટકી છે, જે માત્ર એક ફિલ્મ નહીં, પરંતુ થલાપતિ વિજયના ફિલ્મી યુગનું સ્મરણિય વિદાયગીત બનશે.