હરિયાણામાં એક એવો અનોખો બનાવ સામે આવ્યો છે, જેના વિશે સાંભળીને સામાન્ય લોકો ચોકી જાય તે નવાઈ નહીં. લોકો વાહન ખરીદે છે ત્યારે તેની સાથે જોડાયેલા નંબર માટે પણ ખાસ પસંદગી રાખતા હોય છે. ઘણા લોકો પોતાનો લકી નંબર, જન્મતારીખ, ખાસ અંકશાસ્ત્ર મુજબ કે પછી શોખ તરીકે ફેન્સી નંબર પસંદ કરે છે. પરંતુ હરિયાણા રાજ્યમાં એક વ્યક્તિએ કારના ફેન્સી નંબર ‘HR 88 B 8888’ માટે ચોંકાવનારી રકમ રૂ. 1.17 કરોડ ચૂકવીને દેશનો અત્યાર સુધીનો સૌથી મોંઘો VIP નંબર ખરીદ્યો છે. આ માત્ર શોખ નહીં પરંતુ ભારતમાં VIP નંબર માટે વધતી ક્રેઝ અને લોકોની માનસિકતા દર્શાવે છે.

હરિયાણામાં VIP અથવા ફેન્સી નંબર પ્લેટ માટે દર અઠવાડિયે ઓનલાઈન હરાજી યોજાય છે. fancy.parivahan.gov.in પોર્ટલ પર શુક્રવારે સાંજે 5 વાગ્યાથી લઈને સોમવારની સવારે 9 વાગ્યા સુધી બોલી પ્રક્રિયા ચાલે છે. આ અઠવાડિયે ‘HR 88 B 8888’ ખાતે કુલ 45 અરજીઓ મળી. આ નંબરની શરૂઆતની બોલી માત્ર રૂ.50,000 પરથી શરૂ થઈ હતી, પરંતુ મિનિટે મિનિટ વધતી બોલીને સાંજ સુધીમાં તે રકમ રૂ. 1.17 કરોડ સુધી પહોંચી ગઈ. અનેક ડીલરો અને શોખીનો વચ્ચે કડક સ્પર્ધા જોવા મળી, પરંતુ અંતે એક વ્યક્તિએ આ રકમ ચૂકવીને નંબર પોતાના નામે કરી લીધો.

ભારતમાં ફેન્સી નંબર માટે લોકો મોટો ખર્ચ કરે છે, પરંતુ આ રકમ અત્યાર સુધીની સૌથી ઊંચી ગણાઈ રહી છે. ઘણીવાર વ્યકિતગત માન્યતાઓ, લકી નંબર, અથવા એક ખાસ પ્રતિષ્ઠા દર્શાવવા માટે લોકો ફેન્સી નંબર મેળવે છે. ખાસ કરીને 7, 8 અને 9 જેવા અંકોના કોમ્બિનેશન્સને ઘણા લોકો શુભ માનતા હોય છે. ‘8888’ તો ખાસ કરીને ધન, સમૃદ્ધિ અને શુભતા સાથે જોડાયેલો માનીતું હોવાથી ઘણા લોકો માટે આકર્ષક માનવામાં આવે છે.

હરિયાણામાં છેલ્લાં કેટલાંક મહિનાઓથી ફેન્સી નંબરની બોલીમાં ભારે વધારો નોંધાયો છે. ગયા અઠવાડિયે જ ‘HR 22 W 2222’ નંબર 37.91 લાખ રૂપિયામાં વેચાયો હતો. જ્યારે દેશના અન્ય રાજ્યોમાં પણ ફેન્સી નંબરની બોલીની રકમ નોંધપાત્ર બની રહી છે. કેરળમાં એક અબજોપતિએ પોતાની લેમ્બોર્ગિની માટે ‘KL 07 DG 0007’ નંબર માટે રૂ.45.99 લાખ ચૂકવ્યા હતા. તે વખતે તેને ભારતનો મોંઘામાં મોંઘો નંબર માનવામાં આવ્યો હતો, પરંતુ હવે હરિયાણાએ એ રેકોર્ડને ઘણો પાછળ છોડી દીધો છે.

આવી બોલીઓ માત્ર શોખની બાબત નથી, પરંતુ રાજ્યો માટે એક મોટું રેવન્યૂ સ્રોત પણ બની રહી છે. કાર, બાઈક અથવા લક્ઝરી વાહન સાથે VIP નંબર રાખવાનું ઘણા લોકો માટે સ્ટેટસ સિંબોલ બની ગયું છે. ખાસ કરીને વેપારીઓ, ઉદ્યોગપતિઓ અને ઉચ્ચ આવકવર્ગમાં ફેન્સી નંબર પ્રત્યે ખાસ ઉત્સાહ જોવા મળે છે.

આ બનાવ માત્ર એક નંબરની ખરીદી નહીં પરંતુ ભારતમાં વાહન સંસ્કૃતિ કેવી રીતે બદલાઈ રહી છે તેનો પણ સંકેત આપે છે. કારનો નંબર હવે માત્ર ઓળખ નહીં પરંતુ ઓળખાણ બનતો જઈ રહ્યો છે. (શોખ) ખરેખર મોટી ચીજ છે — અને આ બનાવ એનું જીવતું ઉદાહરણ છે.