રાજકોટ શહેરમાં 7 ડિસેમ્બરે ભારતીય વાયુસેનાની પ્રસિદ્ધ સૂર્યકિરણ એરોબેટિક ટીમનું ભવ્ય એર શો યોજાશે. તાજેતરમાં કેવડિયામાં વડાપ્રધાન નરેન્દ્ર મોદીની હાજરીમાં થયેલા અદ્ભુત એર શોને જેમનો પ્રતિસાદ મળ્યો હતો, એ જ રોમાંચ હવે રાજકોટના આકાશમાં જોવા મળશે. મનપાએ તૈયારીઓ શરૂ કરી દીધી છે અને જામનગરથી ઉડાન ભરતી વિમાનો રાજકોટના આકાશમાં વિવિધ કરતબો રજૂ કરશે.

સૂર્યકિરણ ટીમના 9 હોક જેટ્સ આકાશમાં ડાયમંડ ફોર્મેશન, લૂપ્સ, રોલ્સ, હેડ-ઓન ક્રોસ, ઇન્વર્ટેડ ફ્લાઈટ જેવા અદ્ભુત સ્ટંટ રજૂ કરશે. ખાસ કરીને તિરંગા રંગના ધુમાડા સાથેનું ફ્લાયપાસ્ટ દર્શકોને દેશભક્તિથી ઓતપ્રોત કરી દેશે. પાયલટ્સ લગભગ 5 મીટર જેટલા નજીકના અંતરે વિમાનો ઉડાડી પોતાની ટીમ વર્ક, ચોકસાઈ અને શૌર્યનું પ્રદર્શન કરશે.

આ એર શોની રિહર્સલ 6 ડિસેમ્બરે થશે અને મુખ્ય કાર્યક્રમ 7 ડિસેમ્બરના રોજ લગભગ 40 મિનિટ ચાલશે. બાળકો અને યુવાનો માટે આ એક વિશેષ પ્રેરણાદાયક ક્ષણ બનશે, કારણ કે ભારતીય સશસ્ત્ર દળોની શૌર્યગાથા અવકાશમાં જીવંત જોઈ શકાશે.

ભારતીય વાયુસેનાની સૂર્યકિરણ ટીમની સ્થાપના 1996માં થઈ હતી અને આ ટીમે અત્યાર સુધી 900થી વધુ એરોબેટિક પ્રદર્શનો કર્યા છે. હાલમાં હોક એમ–132 જેટ વિમાનો આ ટીમનો ભાગ છે. ટીમમાં કુલ 13 પાયલટ્સ હોય છે, જેમાં નવ પાયલટ્સ એકસાથે ફોર્મેશન ફ્લાઈટ કરે છે.

રાજકોટમાં થનારો આ એર શો શહેર માટે ગૌરવ અને રોમાંચનું વિશેષ આકર્ષણ બની રહેશે, તે નિશ્ચિત છે.