ભારત અને દક્ષિણ આફ્રિકા વચ્ચેની બે ટેસ્ટ મેચની શ્રેણીનો પ્રથમ મુકાબલો 14 નવેમ્બરથી કોલકાતામાં શરૂ થવાનો છે. તે પહેલાં જ ભારતીય ટીમને લઈને મહત્વપૂર્ણ સમાચાર સામે આવ્યા છે. ભારતીય ઓલરાઉન્ડર નીતિશ કુમાર રેડ્ડીને પ્રથમ ટેસ્ટમાંથી રીલીઝ કરવામાં આવ્યા છે, અને હવે તે રાજકોટમાં ઈન્ડિયા-A ટીમ સાથે વન-ડે સીરિઝમાં ભાગ લેશે.

BCCIએ પોતાના સોશિયલ મીડિયા પ્લેટફોર્મ ‘X’ પર આ માહિતી આપતા જણાવ્યું કે, નીતિશ રેડ્ડી હવે દક્ષિણ આફ્રિકા-A સામેની વન-ડે સીરિઝ માટે ઈન્ડિયા-A ટીમમાં જોડાશે. વન-ડે સીરિઝ પૂર્ણ થયા પછી તે ફરીથી બીજી ટેસ્ટ માટે ભારતીય મુખ્ય ટીમમાં સામેલ થશે.

ભારતીય ટીમના સહાયક કોચ રયાન ટેન ડોશેટે પણ આ નિર્ણયની પુષ્ટિ કરી છે. તેમણે જણાવ્યું કે, રેડ્ડીના સ્થાને ધ્રુવ જુરેલને સ્પેશિયાલિસ્ટ બેટ્સમેન તરીકે ટીમમાં સામેલ કરવામાં આવ્યો છે, જ્યારે વિકેટકીપિંગની જવાબદારી રિષભ પંત સંભાળશે.

ધ્રુવ જુરેલ હાલમાં ઉત્કૃષ્ટ ફોર્મમાં છે. તેણે દક્ષિણ આફ્રિકા સામેની બિનસત્તાવાર ટેસ્ટમાં બંને ઈનિંગ્સમાં સદી ફટકારી હતી, તેમજ અગાઉ વેસ્ટ ઈન્ડીઝ ટેસ્ટ સીરિઝમાં પણ શાનદાર સદી નોંધાવી હતી. તેથી તેની પ્લેઈંગ ઈલેવનમાં સ્થાન મેળવવાની દાવેદારી મજબૂત બની છે.

ટીમ મેનેજમેન્ટ અને કોચ ગૌતમ ગંભીરનો ઉદ્દેશ નીતિશ કુમાર રેડ્ડીને ટેસ્ટ ફોર્મેટમાં એક સ્થિર ઓલરાઉન્ડર તરીકે વિકસાવવાનો છે. તે માટે તેમને સતત તકો આપવામાં આવી રહી છે. રેડ્ડીએ અત્યાર સુધીમાં 9 ટેસ્ટ મેચમાં 386 રન નોંધાવ્યા છે અને 8 વિકેટ મેળવી છે.

હાલ માટે રેડ્ડી રાજકોટ જઈને ઈન્ડિયા-A ટીમમાં જોડાશે, જ્યારે કોલકાતા ટેસ્ટમાં ધ્રુવ જુરેલ ભારતીય ટીમ માટે નવી તક તરીકે ઉતરશે.