રાજકોટ, દિલ્હીમાં થયેલી બ્લાસ્ટની ઘટનાએ સુરક્ષા એજન્સીઓને ચેતી કરી છે. તેના પગલે રાજ્યભરના મુખ્ય શહેરોમાં સુરક્ષા ચુસ્ત બનાવવામાં આવી છે. રાજકોટ શહેર પોલીસ પણ એક્શન મોડમાં આવી ગઈ છે અને શહેરના વિવિધ જાહેર સ્થળોએ સઘન ચેકીંગ હાથ ધરવામાં આવ્યું છે. ખાસ કરીને રાજકોટ બસ પોર્ટ પર આજે પોલીસ દ્વારા વિશાળ ચેકીંગ અભિયાન હાથ ધરાયું હતું.

રાજકોટ ક્રાઇમ બ્રાન્ચ, SOG તેમજ સ્થાનિક પોલીસ સ્ટેશનોની ટીમો જોડાઈ હતી. પોલીસના અધિકારીઓએ જણાવ્યા મુજબ, જાહેર સ્થળોએ કોઈપણ પ્રકારની સંદિગ્ધ પ્રવૃત્તિ કે સામાન મળતાં તાત્કાલિક કાર્યવાહી માટે ખાસ દિશા-નિર્દેશ અપાયા છે. બસ પોર્ટ ખાતે મુસાફરોના બેગ, લૉકર્સ અને પાર્કિંગ વિસ્તારમાં ઊભેલાં વાહનોની ચકાસણી કરવામાં આવી.

ડોગ સ્કોડની ટીમ પણ આ ચેકીંગમાં જોડાઈ હતી. ખાસ તાલીમ પ્રાપ્ત ડોગ્સ દ્વારા પ્લેટફોર્મ, વેઇટિંગ એરિયા અને પાર્કિંગ ઝોનમાં તપાસ હાથ ધરવામાં આવી. ચેકીંગ દરમિયાન કોઈ સંદિગ્ધ વસ્તુ મળી નહોતી, પરંતુ પોલીસે સુરક્ષા વ્યવસ્થા વધુ કડક બનાવી દીધી છે.

રાજકોટ રેન્જના અધિકારીઓએ જણાવ્યું કે, “દિલ્હી જેવી ઘટનાઓ સામે સજાગ રહેવું આવશ્યક છે. કોઈપણ શંકાસ્પદ વસ્તુ અથવા વ્યક્તિ જોવા મળે તો તાત્કાલિક પોલીસને જાણ કરવી જોઈએ.”

આ ચેકીંગ અભિયાનનો મુખ્ય હેતુ શહેરમાં સુરક્ષાની લાગણી મજબૂત કરવો અને સંભવિત જોખમોને સમયસર રોકવાનો છે. આગામી દિવસોમાં પણ પોલીસ દ્વારા જાહેર સ્થળો, રેલવે સ્ટેશન અને ધર્મસ્થળો પર ચેકીંગ ચાલુ રાખવામાં આવશે.