વડોદરા શહેરના વિસ્તરણ બાદ પશ્ચિમ ઝોનમાં નાગરિકોને વધુ સારી સુવિધાઓ પૂરી પાડવા માટે માર્ગ નિર્માણના કાર્યો તેજ ગતિએ ચાલી રહ્યા છે. શહેરના વોર્ડ નં. 10 અને 12 હેઠળ આવતા વિસ્તારોમાં કુલ રૂ. 3.50 કરોડના ખર્ચે 12 નવા રસ્તા બનાવવાની કામગીરી હાલમાં પ્રગતિ હેઠળ છે.

આ માર્ગો મુખ્યત્વે બીલ, કલાલી અને ભાયલી વિસ્તારોમાં બનાવાઈ રહ્યા છે, જ્યાં છેલ્લા કેટલાક વર્ષોમાં વસવાટ અને વિકાસ ઝડપથી વધ્યો છે. વડોદરા મ્યુનિસિપલ કોર્પોરેશનના જણાવ્યા મુજબ, આવનારા સમયમાં પશ્ચિમ ઝોનમાં વધુ રૂ. 23.08 કરોડના ખર્ચે 70 નવા મુખ્ય અને આંતરિક માર્ગો બનાવવા માટે પણ આયોજન થઈ ચૂક્યું છે.

મ્યુનિસિપલ કમિશનર અરુણ મહેશ બાબુની અધ્યક્ષસ્થાને યોજાયેલી સમીક્ષા બેઠકમાં જણાવાયું કે વધારાના 55 માર્ગો માટેનું સર્વેક્ષણ પૂર્ણ થઈ ગયું છે. હવે શહેરના તમામ માર્ગો મિનિસ્ટ્રી ઑફ રોડ ટ્રાન્સપોર્ટ અને ઈન્ડિયન રોડ કોંગ્રેસની માર્ગદર્શિકા મુજબ બનાવવામાં આવશે.

આ પ્રોજેક્ટ માટે પ્રોજેક્ટ વિભાગના કામોનો DLP સમયગાળો 10 વર્ષ અને ઝોનલ વિભાગ દ્વારા કરવામાં આવતા કામોનો સમયગાળો 5 વર્ષ રાખવામાં આવ્યો છે. કોર્પોરેશન હવે પેકેજ રોડ સિસ્ટમ અમલમાં લાવશે, જેના દ્વારા શહેરના રસ્તાઓ ખાડામુક્ત, ટકાઉ અને લાંબા સમય સુધી ઉપયોગી રહેશે.

પ્રથમ તબક્કામાં પશ્ચિમ ઝોનમાં આ યોજના અમલમાં મુકાઈ રહી છે, જ્યારે આગામી તબક્કામાં અન્ય ઝોનમાં પણ આ પ્રકારની આધુનિક માર્ગ સુવિધા વિકસાવવામાં આવશે. વડોદરા માટે આ પહેલ શહેરના સંકલિત વિકાસ તરફનું મહત્વપૂર્ણ પગલું ગણાય છે.