નવી દિલ્હી,

પાકિસ્તાનની દુર્ગમ કારાકોરમ પર્વતમાળામાં આવેલા વિશ્વના ૧૨મા સૌથી ઊંચા 'બ્રોડ પીક' (૮,૦૪૭ મીટર) પર એક દર્દનાક દુર્ઘટના સર્જાઈ છે. પર્વતારોહણ અભિયાન દરમિયાન અચાનક ત્રાટકેલા ભીષણ હિમપ્રપાતમાં વિશ્વ વિખ્યાત નેપાળી પર્વતારોહક અને રેકોર્ડમેકર નિર્મલ પુર્જા સહિત ૧૦ સભ્યોની આંતરરાષ્ટ્રીય ટીમ ગુમ થઈ ગઈ છે. આ દુર્ઘટના બાદ પર્વતારોહણ જગતમાં શોક અને ચિંતાનું મોજું ફરી વળ્યું છે.

બ્રિટિશ આર્મીના ભૂતપૂર્વ સૈનિક અને ‘નિમ્સડાઈ’ તરીકે વૈશ્વિક ઓળખ ધરાવતા નિર્મલ પુર્જા ૧૦ સભ્યોના એક આંતરરાષ્ટ્રીય અભિયાન જૂથનું નેતૃત્વ કરી રહ્યા હતા. આ ટીમ ગુરુવારે બપોરે અંદાજે ૬,૬૦૦ મીટરની ઊંચાઈએ બ્રોડ પીક પર શિખર સર કરવાના ચઢાણ પર હતી, તે જ સમયે બરફનો મોટો ભાગ તૂટી પડવાથી હિમપ્રપાત થયો હતો. આ ઘટના બાદથી આખી ટીમ સાથેનો સંપર્ક તૂટી ગયો છે અને તેઓ ગુમ જાહેર થયા છે.

આ ગંભીર દુર્ઘટનાની જાણ થતાં જ આલ્પાઇન ક્લબ ઓફ પાકિસ્તાન અને સ્થાનિક પ્રશાસન દ્વારા ત્વરિત પગલાં લેવામાં આવ્યા છે. બચાવ ટીમો દ્વારા હાથ ધરાયેલા સર્ચ ઓપરેશન દરમિયાન અત્યાર સુધી બેઝ કેમ્પ સામેના વિસ્તારમાંથી ૪ મૃતદેહ મળી આવ્યા હોવાના અહેવાલ છે, જેમાંથી કેટલાક મૃતકોની ઓળખ પ્રક્રિયા હાથ ધરવામાં આવી છે. ગુમ થયેલા અન્ય પર્વતારોહકોની શોધખોળ માટે હેલિકોપ્ટર સેવાઓ અને ગ્રાઉન્ડ રેસ્ક્યૂ ટીમોને કામે લગાડવામાં આવી છે, પરંતુ ખરાબ હવામાન અને દુર્ગમ ભૌગોલિક સ્થિતિ વચ્ચે બચાવ કામગીરીમાં ભારે મુશ્કેલીઓનો સામનો કરવો પડી રહ્યો છે.