રાજકોટ,

રેસકોર્ષમાં લોકમેળા ની તૈયારીનો ધમધમાટ

રાજકોટના લોકપ્રિય અને શાન ગણાતા લોકમેળાના આયોજન માટે તંત્ર દ્વારા યુદ્ધના ધોરણે કામગીરી શરૂ કરવામાં આવી છે. રેસકોર્ષના મેદાનમાં હવે મેળો જામવા માટેની તૈયારીઓનો ધમધમાટ જોવા મળી રહ્યો છે. આ વર્ષના મેળાને વધુ સુવ્યવસ્થિત અને સુરક્ષિત બનાવવા માટે વહીવટીતંત્ર દ્વારા વિશેષ આયોજન કરવામાં આવ્યું છે.

મેળાના સ્થળે હાલમાં વિવિધ સ્ટોલ, સાંસ્કૃતિક કાર્યક્રમો માટેનું મુખ્ય સ્ટેજ અને સુરક્ષા વ્યવસ્થા પર બાજ નજર રાખવા માટે વોચ ટાવર ઉભા કરવાનું કામ શરૂ કરી દેવામાં આવ્યું છે. આ કામગીરી ઝડપભેર પૂર્ણ કરવા માટે સંબંધિત વિભાગોને સૂચના આપવામાં આવી છે, જેથી સમયસર મેળાની અન્ય વ્યવસ્થાઓ ગોઠવી શકાય.
 

સ્ટોલ, મુખ્ય સ્ટેજ અને વોચ ટાવરના નિર્માણનો પ્રારંભ

વરસાદી પાણીના નિકાલ માટે નવી વ્યવસ્થા દર વર્ષે ચોમાસા દરમિયાન મેળાના મેદાનમાં પાણી ભરાવાની સમસ્યા સર્જાતી હોય છે, જેને ધ્યાનમાં રાખીને આ વખતે તંત્ર દ્વારા કાયમી ઉકેલ શોધવામાં આવ્યો છે. રેસકોર્ષ ગ્રાઉન્ડમાં વરસાદી પાણીના નિકાલ માટે સૌપ્રથમવાર પાઈપ ગટર નાખવાની કામગીરી કરવામાં આવી રહી છે. આ આધુનિક ડ્રેનેજ સિસ્ટમ લાગુ થવાથી મેળા દરમિયાન જો વરસાદ પડે, તો પણ નાગરિકોને કોઈ હાલાકી ન ભોગવવી પડે તેવો પ્રયાસ તંત્ર દ્વારા હાથ ધરવામાં આવ્યો છે.