મિડલ ઈસ્ટમાં ચાલી રહેલા યુદ્ધના પડઘા હવે ગુજરાતમાં પણ સાંભળવા મળી રહ્યા છે. ઈઝરાયલ, અમેરિકા અને ઈરાન વચ્ચે તણાવ યથાવત હોવાથી તેની સીધી અસર ગેસ સપ્લાય પર પડી છે. પરિણામે ગુજરાતના હોટલ, રેસ્ટોરન્ટ અને કેટરિંગ ઉદ્યોગને ભારે મુશ્કેલીનો સામનો કરવો પડી રહ્યો છે. કોમર્શિયલ ગેસ સિલિન્ડરની અછતને કારણે ખાસ કરીને હાઈવે પર આવેલી હોટલો અને શહેરોની ખાણીપીણી લારીઓ પર અસર જોવા મળી રહી છે.
 

મેનુમાંથી ગાયબ થઈ રહી છે તળેલી વાનગીઓ

ગેસની અછતને કારણે ઘણી હોટલો અને લારીઓએ મેનુમાંથી તળેલી વાનગીઓ દૂર કરી દીધી છે. અમદાવાદ સહિત અનેક શહેરોમાં “ભજિયા-સમોસા જેવી તળેલી વાનગી ઉપલબ્ધ નથી” એવા પાટિયા જોવા મળી રહ્યા છે. હોટલ સંચાલકો જણાવે છે કે કોમર્શિયલ ગેસ સિલિન્ડર સમયસર મળતા નથી, જેના કારણે ઘણી વાનગીઓ બનાવવી શક્ય નથી. હાલ માત્ર રોજિંદા અને સરળ રીતે બનતી વાનગીઓ જ તૈયાર કરવામાં આવી રહી છે.
 

હાઈવે હોટલોની સ્થિતિ વધુ વિકટ

ખાસ કરીને હાઈવે પર આવેલી હોટલો માટે પરિસ્થિતિ વધુ ગંભીર બની છે. ગેસ સિલિન્ડરની અછતને કારણે ઘણા સંચાલકોને રસોઈ માટે કોલસા અને લાકડાનો સહારો લેવો પડી રહ્યો છે. રસોડામાં ફરીથી ધુમાડાભર્યું વાતાવરણ સર્જાયું છે. ગેસના અભાવે ઘણી હોટલોને મેનુ સીમિત રાખવું પડ્યું છે, જેના કારણે ગ્રાહકોની સંખ્યામાં પણ ઘટાડો નોંધાયો છે.
 

સિલિન્ડરની કાળાબજારી, ભાવ 4500 સુધી

ગેસની અછતનો લાભ લઈને કાળાબજારિયાઓ સક્રિય થયા છે. સામાન્ય દિવસોમાં સરળતાથી મળતો કોમર્શિયલ સિલિન્ડર હવે મળવો મુશ્કેલ બની ગયો છે. કેટલાક સ્થળોએ સિલિન્ડર માટે 4500 રૂપિયા સુધી વસૂલાત થતી હોવાના અહેવાલો સામે આવ્યા છે. હોટલ સંચાલકો કહે છે કે વધેલા ખર્ચને કારણે તેમને આર્થિક નુકસાન વેઠવું પડી રહ્યું છે.
 

હોટલો દ્વારા ભાવવધારાની શક્યતા

જો આ સ્થિતિ લાંબા સમય સુધી ચાલુ રહેશે તો હોટલ અને રેસ્ટોરન્ટ સંચાલકો માટે ભાવ વધારવા સિવાય કોઈ વિકલ્પ નહીં રહે. જેના કારણે ગ્રાહકોના ખિસ્સા પર પણ અસર પડશે. ઘણા લોકો મહિને એકાદ-બે વાર હોટલમાં જમવા જતા હોય છે, પરંતુ વધતા ખર્ચને કારણે તે સંખ્યા ઘટવાની શક્યતા છે.
 

ઇન્ડક્શન અને ઇલેક્ટ્રિક સગડીની માંગ વધી

ગેસની અછત વચ્ચે લોકો હવે વિકલ્પ તરીકે ઇલેક્ટ્રિક સગડી અને ઇન્ડક્શન તરફ વળી રહ્યા છે. બજારમાં તેની માંગમાં લગભગ 25 ટકા વધારો નોંધાયો છે, જ્યારે ભાવમાં પણ 15 ટકા જેટલો વધારો થયો છે. દુકાનોમાં હાલ સ્થિતિ એવી છે કે ઇન્ડક્શન અને ઇલેક્ટ્રિક સગડી માટે “આઉટ ઓફ સ્ટોક”ના પાટિયા લાગી રહ્યા છે. જ્યાં પહેલા રોજ 10 થી 15 ઇન્ડક્શન વેચાતા હતા, ત્યાં હવે રોજ 100 જેટલા લોકો તેની પૂછપરછ કરી રહ્યા છે. સ્ટોક ન હોવાથી ગ્રાહકોને 10 થી 15 દિવસનું એડવાન્સ બુકિંગ કરાવવું પડી રહ્યું છે.
 

સરકાર સમક્ષ રજૂઆત

હોટલ એસોસિએશન દ્વારા સરકાર સમક્ષ ગેસ સપ્લાય ઝડપથી સુધારવાની માંગ કરવામાં આવી છે. સંચાલકોનું કહેવું છે કે જો ગેસ પુરવઠો વહેલી તકે સ્થિર નહીં થાય તો ગુજરાતના હોટલ અને કેટરિંગ ઉદ્યોગને મોટો આર્થિક ફટકો પડી શકે છે.

મિડલ ઈસ્ટમાં ચાલી રહેલા યુદ્ધની અસર હવે સ્થાનિક વેપાર અને રોજિંદા જીવન પર પણ દેખાવા લાગી છે. આગામી દિવસોમાં પરિસ્થિતિ કેવી રીતે બદલાય છે તે પર સૌની નજર ટકેલી છે.