નવી દિલ્હી,

​અંગત મુલાકાતે નેપાળ ગયા હતા ગોપીસેટ્ટી, પૂરની આફત બાદ સંપર્ક વિહોણા બન્યા

​નેપાળમાં તાજેતરમાં આવેલા વિનાશક પૂર અને ભૂસ્ખલને ભયાનક તારાજી સર્જી છે, જેમાં સેંકડો લોકો પ્રભાવિત થયા છે. આ કુદરતી આફત વચ્ચે દેશ-વિદેશના પ્રવાસીઓ પણ મુશ્કેલીમાં મુકાયા છે. પ્રાપ્ત વિગતો અનુસાર, ભારતની અગ્રણી આઈટી કંપની ઇન્ફોસિસ લિમિટેડની યુએસ અને કેનેડા સ્થિત જાહેર ક્ષેત્રની સેવાઓ સંભાળતી પેટાકંપની 'ઇન્ફોસિસ પબ્લિક સર્વિસીસ'ના CEO લક્ષ ગોપીસેટ્ટી નેપાળમાં ગુમ થઈ ગયા છે. કંપની દ્વારા શુક્રવારે આ દુર્ઘટના અંગે સત્તાવાર નિવેદન કરવામાં આવ્યું છે, જેનાથી ભારે ચિંતાનું મોજું ફરી વળ્યું છે.

કંપનીના સૂત્રોના જણાવ્યા અનુસાર, લક્ષ ગોપીસેટ્ટી કોઈ સત્તાવાર કંપનીના કામકાજ અર્થે નહીં, પરંતુ પોતાની અંગત મુલાકાતે નેપાળની યાત્રાએ ગયા હતા. આ દરમિયાન નેપાળમાં અચાનક ફાટી નીકળેલી પૂરની વિકટ પરિસ્થિતિ અને ભૂસ્ખલનને કારણે તેમની સાથેના તમામ સંપર્કો તૂટી ગયા હતા. આફત આવ્યા બાદ લાંબા સમય સુધી કોઈ પતો ન લાગતા કંપની અને તેમના પરિવારજનોમાં ચિંતાની લાગણી વ્યાપી ગઈ છે.

આ ગંભીર સ્થિતિને ધ્યાનમાં રાખીને ઇન્ફોસિસ મેનેજમેન્ટે લક્ષ ગોપીસેટ્ટીની સુરક્ષા અને સુખાકારીને સર્વોચ્ચ પ્રાથમિકતા આપી છે. કંપનીના પ્રવક્તાએ જણાવ્યું હતું કે, ગોપીસેટ્ટી સાથે સંપર્ક સ્થાપિત કરવા માટે સ્થાનિક વહીવટી તંત્ર, બચાવ એજન્સીઓ અને સત્તાવાર સંસ્થાઓ સાથે સતત સંકલન સાધવામાં આવી રહ્યું છે. આ સાથે જ કંપની દ્વારા તેમના પરિવારને પણ આ મુશ્કેલ સમયમાં તમામ જરૂરી સહયોગ અને સાંત્વના પૂરી પાડવામાં આવી રહી છે. ​ઉલ્લેખનીય છે કે, લક્ષ ગોપીસેટ્ટી ઉત્તર અમેરિકાના પબ્લિક સેક્ટર બિઝનેસમાં ઇન્ફોસિસના ગ્લોબલ કાર્યોને આગળ ધપાવવામાં મહત્વની ભૂમિકા ભજવી રહ્યા છે. હાલ સમગ્ર દેશ અને આઈટી સેક્ટરમાં તેમની સુરક્ષિત વાપસી માટે પ્રાર્થનાઓ થઈ રહી છે.