નવી દિલ્હી,

હવે સરકારી સેવાઓનો લાભ મળશે પોતાની માતૃભાષામાં

કેન્દ્ર સરકાર દ્વારા દેશના નાગરિકોને સરકારી સેવાઓ વધુ સુલભ અને પારદર્શક બનાવવા માટે એક મહત્વપૂર્ણ નિર્ણય લેવામાં આવ્યો છે. હવે સરકારી સેવાઓ માત્ર અંગ્રેજી કે હિન્દી સુધી સીમિત નહીં રહે, પરંતુ નાગરિકો પોતાની માતૃભાષામાં આ તમામ સેવાઓનો લાભ મેળવી શકશે. આ દિશામાં સરકારે કમર કસી છે અને વિવિધ ભારતીય ભાષાઓ તથા અદ્યતન આર્ટિફિશિયલ ઇન્ટેલિજન્સ ટેકનોલોજી પર કામ કરવાનું શરૂ કર્યું છે.

સરકાર દ્વારા વિકસાવવામાં આવી રહેલી આ નવી સિસ્ટમમાં 'વોઇસ'થી સંચાલિત AI ટેકનોલોજીનો ઉપયોગ કરવામાં આવશે. આનાથી એવા નાગરિકોને સૌથી વધુ ફાયદો થશે જેમને ટેક્નિકલ જાણકારી ઓછી છે અથવા જેઓ વાંચન-લેખનમાં અગવડતા અનુભવે છે. હવે માત્ર બોલીને જ સરકારી પોર્ટલ કે હેલ્પલાઇન દ્વારા પોતાની જરૂરિયાત મુજબની માહિતી મેળવી શકાશે.

આ પહેલનો મુખ્ય ઉદ્દેશ્ય છેવાડાના માનવી સુધી સરકારી સેવાઓ પહોંચાડવાનો છે. આ નવી વ્યવસ્થા અમલમાં આવતા, દેશના દરેક ખૂણેથી નાગરિકો પોતાની પ્રાદેશિક ભાષામાં પોતાની ફરિયાદ નોંધાવી શકશે, અરજી કરી શકશે અને જરૂરી સરકારી માહિતી મેળવી શકશે.