રાજકોટ સહિત સમગ્ર સૌરાષ્ટ્રમાં પોસ્ટ ઓફિસ અને પાસપોર્ટ ઓફિસોને બોમ્બથી ઉડાડવાની ધમકી મળતાં પોલીસ તંત્ર સક્રિય બની ગયું હતું. આ ધમકી બાદ તકેદારીના ભાગરૂપે વિવિધ શહેરોમાં આવેલી પોસ્ટ ઓફિસ અને પાસપોર્ટ ઓફિસોમાં એન્ટી-સબોટેજ ચેકિંગ હાથ ધરવામાં આવ્યું હતું. જોકે, લાંબા સમય સુધી ચાલેલી તપાસ બાદ ક્યાંયથી પણ કોઈ શંકાસ્પદ વસ્તુ મળી ન આવતાં અંતે આ ધમકી પોકળ સાબિત થઈ હતી.

માહિતી મુજબ, થોડા દિવસો પહેલા પણ આ જ પ્રકારની ધમકી મળતાં પોલીસ તંત્ર સતર્ક બન્યું હતું. અંદાજે 12 દિવસ પહેલા અમદાવાદની રિજનલ પાસપોર્ટ ઓફિસને બોમ્બથી ઉડાડવાની ધમકી આપવામાં આવી હતી. તે સમયે પણ તકેદારીના ભાગરૂપે સૌરાષ્ટ્રના અનેક શહેરોમાં પોસ્ટ ઓફિસ અને પાસપોર્ટ ઓફિસોમાં તપાસ કરવામાં આવી હતી. હવે ફરી એકવાર સુરતની રિજનલ પાસપોર્ટ ઓફિસને આવી જ પ્રકારની ધમકીભર્યો ઇમેઇલ મળતાં પોલીસ ફરીથી એલર્ટ બની ગઈ અને સૌરાષ્ટ્રના શહેરોમાં સઘન ચેકિંગ શરૂ કર્યું હતું.

રાજકોટ શહેરમાં ગોંડલ રોડ પર આવેલી પાસપોર્ટ ઓફિસ તેમજ હરિહર ચોક પાસે આવેલી મુખ્ય પોસ્ટ ઓફિસમાં પોલીસના દળોએ પહોંચીને તપાસ હાથ ધરી હતી. એ ડિવિઝન પોલીસ સાથે એસઓજી અને ક્રાઇમ બ્રાંચની ટીમો પણ સ્થળ પર પહોંચી હતી. બોમ્બ ડિસ્પોઝલ સ્ક્વોડ અને સ્નાઇફર ડોગની મદદથી કચેરીઓના ખૂણેખૂણાની તપાસ કરવામાં આવી હતી. ઉપરાંત આસપાસના વિસ્તારમાં પણ ચેકિંગ કરવામાં આવ્યું હતું. જોકે લાંબી તપાસ બાદ કોઈ શંકાસ્પદ વસ્તુ મળી ન આવતાં અધિકારીઓએ રાહતનો શ્વાસ લીધો હતો.

જૂનાગઢ શહેરમાં પણ આવી જ સ્થિતિ જોવા મળી હતી. ગાંધીગ્રામ ચોક વિસ્તારમાં આવેલી પોસ્ટ ઓફિસમાં પોલીસ, એસઓજી, બોમ્બ સ્ક્વોડ અને ફાયર બ્રિગેડની ટીમો પહોંચી હતી. સુરક્ષાને ધ્યાનમાં રાખીને પોસ્ટ ઓફિસને તાત્કાલિક ખાલી કરાવવામાં આવી હતી. કર્મચારીઓ તેમજ કામ માટે આવેલા અરજદારોને બહાર જવા માટે કહેવામાં આવ્યું હતું. ત્યારબાદ બોમ્બ સ્ક્વોડ દ્વારા સમગ્ર કચેરીની સઘન તપાસ હાથ ધરવામાં આવી હતી. અંદાજે દોઢથી બે કલાક સુધી ચાલેલી તપાસ બાદ કોઈ પણ પ્રકારની શંકાસ્પદ વસ્તુ મળી ન આવતાં સૌએ હાશકારો અનુભવ્યો હતો.

અમરેલીમાં પણ પોસ્ટ ઓફિસમાં જ પાસપોર્ટ સેવા કેન્દ્ર કાર્યરત હોવાથી પોલીસ ત્યાં પણ પહોંચી હતી. સુરક્ષાને ધ્યાનમાં રાખીને કચેરી ખાલી કરાવવામાં આવી હતી અને આસપાસના વિસ્તારોમાં પણ તપાસ હાથ ધરવામાં આવી હતી. પોલીસની આ અચાનક કાર્યવાહીથી કર્મચારીઓ તેમજ કામ માટે આવેલા લોકોમાં થોડો સમય માટે ગભરાટ ફેલાયો હતો. જોકે, તપાસ પૂર્ણ થયા બાદ કોઈ જોખમ ન હોવાનું સ્પષ્ટ થતા પરિસ્થિતિ સામાન્ય બની ગઈ હતી.

જામનગર શહેરમાં ચાંદી બજાર વિસ્તારમાં આવેલી મુખ્ય પોસ્ટ ઓફિસમાં પણ પોલીસ દ્વારા ચેકિંગ કરવામાં આવ્યું હતું. ધમકીમાં પાર્સલ મારફતે બોમ્બ મૂકવામાં આવ્યો હોવાની શક્યતા વ્યક્ત કરવામાં આવી હોવાથી તમામ પાર્સલોની પણ ખાસ તપાસ કરવામાં આવી હતી. પોસ્ટ ઓફિસ ખાલી કરાવી પોલીસ અને બોમ્બ સ્ક્વોડે સમગ્ર કચેરી તેમજ આસપાસના વિસ્તારોની ચકાસણી કરી હતી. પરંતુ ત્યાંથી પણ કોઈ શંકાસ્પદ વસ્તુ મળી ન આવતાં અંતે ચેકિંગ પૂર્ણ કરવામાં આવ્યું હતું.

મોરબી શહેરમાં પરાબજાર વિસ્તારમાં આવેલી મુખ્ય પોસ્ટ ઓફિસમાં પણ સ્થાનિક પોલીસે તાત્કાલિક કાર્યવાહી હાથ ધરી હતી. પોલીસ પહોંચતા જ કર્મચારીઓ અને અરજદારોને બહાર કાઢવામાં આવ્યા હતા અને ત્યારબાદ સમગ્ર કચેરીમાં સઘન તપાસ કરવામાં આવી હતી. બોમ્બ સ્ક્વોડ અને સ્નાઇફર ડોગની મદદથી દરેક ખૂણાની તપાસ કરવામાં આવી હતી, પરંતુ અંતે અહીં પણ કંઈ વાંધાજનક વસ્તુ મળી ન હતી.

આ સમગ્ર ઘટનાને કારણે અનેક શહેરોમાં થોડા સમય માટે દોડધામ અને ગભરાટનો માહોલ સર્જાયો હતો. પોસ્ટ ઓફિસ અને પાસપોર્ટ ઓફિસમાં કામ માટે આવેલા લોકોના કામમાં પણ થોડો વિલંબ થયો હતો. જોકે, સુરક્ષાને ધ્યાનમાં રાખીને પોલીસ દ્વારા કરવામાં આવેલી કાર્યવાહી જરૂરી હોવાનું અધિકારીઓએ જણાવ્યું હતું.

ઉલ્લેખનીય છે કે રાજ્યમાં છેલ્લા થોડા સમયથી આવી પ્રકારની ખોટી ધમકીઓ આપવાની ઘટનાઓ સામે આવી રહી છે. હજુ સુધી આવી ધમકી આપનાર વ્યક્તિ અથવા જૂથ પોલીસના હાથમાં આવ્યું નથી. જેના કારણે સાયબર તપાસ અને સુરક્ષા વ્યવસ્થાને લઈને અનેક સવાલો ઊભા થયા છે. પોલીસ તંત્ર હવે આ ઇમેઇલ અને ધમકી પાછળ કોણ જવાબદાર છે તેની શોધખોળમાં લાગી ગયું છે.

આ ઘટનામાં ભલે કોઈ શંકાસ્પદ વસ્તુ મળી ન આવી હોય, પરંતુ સુરક્ષા દ્રષ્ટિએ પોલીસ તંત્ર સંપૂર્ણ સતર્ક હોવાનું ફરી એકવાર સ્પષ્ટ થયું છે. આગામી સમયમાં આવી ધમકીઓ સામે કડક કાર્યવાહી કરવામાં આવશે અને જવાબદાર વ્યક્તિઓને ઝડપથી પકડવામાં આવશે તેવી પણ પોલીસ દ્વારા ખાતરી આપવામાં આવી છે.