રાજકોટ શહેરની ભાગોળે રાજકોટ–મોરબી હાઇવે પર સ્થિત મારવાડી યુનિવર્સિટી ખાતે યોજાનાર વાઇબ્રન્ટ ગુજરાત રિજનલ કોન્ફરન્સ પૂર્વે વહીવટી તંત્ર હરકતમાં આવ્યું છે. આ અંતર્ગત તાજેતરમાં કલેકટર કચેરી ખાતે યોજાયેલી બેઠકમાં **રાજકોટ મહાપાલિકાની હદથી મારવાડી યુનિવર્સિટી સુધીના સમગ્ર રૂટ પરથી લારી-ગલ્લા, કેબિન સહિતના તમામ નાના-મોટા દબાણો હટાવવા રાજકોટ અર્બન ડેવલપમેન્ટ ઓથોરિટી (રૂડા)**ને સ્પષ્ટ આદેશ આપવામાં આવ્યો હોવાનું જાણવા મળ્યું છે.

વાઇબ્રન્ટ ગુજરાત રિજનલ કોન્ફરન્સને લઈ રાજકોટ મહાનગરપાલિકા દ્વારા સક્રિયતા દાખવાઈ રહી છે, પરંતુ રૂડાની ભૂમિકા અંગે હજુ સુધી અસંતોષ જોવા મળી રહ્યો છે. આજ દિન સુધી રૂડા દ્વારા વાઇબ્રન્ટ સંદર્ભે કયા પગલાં લેવામાં આવ્યા, કેટલા હુકમો કરાયા, કઈ કામગીરી માટે કેટલી કમિટીઓ રચાઈ – તેની કોઈ સત્તાવાર માહિતી જાહેર કરવામાં આવી નથી. એટલું જ નહીં, એક પણ પ્રેસ રિલીઝ કે જાહેર જાહેરાત રૂડા તરફથી બહાર પાડવામાં આવી નથી, જેના કારણે રૂડાની નિષ્ક્રિયતા પર સવાલો ઊઠી રહ્યા છે.
 

કલેકટર કચેરીમાં સંયુક્ત બેઠક

તાજેતરમાં યોજાયેલી બેઠકમાં રાજકોટ મહાપાલિકા, રૂડા, કલેકટર કચેરી, આરટીઓ, માર્ગ અને મકાન વિભાગ, ફોરેસ્ટ વિભાગ તથા નેશનલ હાઇવે ઓથોરિટી સહિતના વિભાગોના અધિકારીઓ ઉપસ્થિત રહ્યા હતા. બેઠકમાં નક્કી કરવામાં આવ્યું હતું કે, જે વિસ્તાર જે વિભાગની હદમાં આવે છે તે વિભાગે પોતાની હદમાં આવતા દબાણો તાત્કાલિક દૂર કરવાની કાર્યવાહી શરૂ કરવી પડશે.

આ બેઠકમાં “સિંગલ લાઇન” સૂચના આપીને સ્પષ્ટ કરવામાં આવ્યું હતું કે વાઇબ્રન્ટ ગુજરાત કોન્ફરન્સ પૂર્વે માર્ગ પર કોઈપણ પ્રકારના અવરોધ, દબાણ કે અસુવિધા રહેવી ન જોઈએ. ખાસ કરીને વિદેશી મહેમાનો, ઉદ્યોગપતિઓ અને પ્રતિનિધિઓની અવરજવર ધ્યાનમાં રાખીને આ માર્ગને સંપૂર્ણ સ્વચ્છ, સુવ્યવસ્થિત અને સુરક્ષિત બનાવવાનો આદેશ આપવામાં આવ્યો છે.
 

એક હજાર જેટલા દબાણો હોવાનો અંદાજ

પ્રાથમિક સર્વે મુજબ રાજકોટની હદથી મારવાડી યુનિવર્સિટી સુધીના માર્ગ પર નાના-મોટા સ્થાયી અને અસ્થાયી મળીને અંદાજે એક હજાર જેટલા દબાણો હોવાનું અનુમાન છે. જેમાં લારી-ગલ્લા, કેબિન, પાનની દુકાનો, અસ્થાયી શેડ, ખાનગી બાંધકામ સહિતના દબાણો સામેલ છે. આ દબાણો દૂર કરવા માટે વિશાળ કાર્યવાહીની જરૂર પડશે.
 

વાઇબ્રન્ટ ગુજરાત રિજનલ કોન્ફરન્સનું મહત્વ

ઉલ્લેખનીય છે કે, મારવાડી યુનિવર્સિટી ખાતે તા. 10, 11 અને 12 જાન્યુઆરી 2025ના રોજ વાઇબ્રન્ટ ગુજરાત રિજનલ કોન્ફરન્સ યોજાનાર છે. આ કોન્ફરન્સ સૌરાષ્ટ્ર-કચ્છ કેન્દ્રિત રહેશે અને વૈશ્વિક સ્તરે પ્રખ્યાત વાઇબ્રન્ટ ગુજરાત ગ્લોબલ સમિટ મોડેલનું પ્રાદેશિક સ્વરૂપ છે.

દરેક રિજનલ કોન્ફરન્સનો મુખ્ય હેતુ  પ્રદેશની ઔદ્યોગિક, આર્થિક અને વ્યાવસાયિક ક્ષમતાને ઉજાગર કરવાનો તથા તેના વિકાસને વેગ આપવાનો છે. આ પહેલા એક દિવસીય જિલ્લા સ્તરના કાર્યક્રમો યોજાશે, જેમાં સ્થાનિક તકો, પહેલો અને સંભાવનાઓ રજૂ કરવામાં આવશે.
 

વિવિધ કાર્યક્રમો અને સેમિનાર

કોન્ફરન્સ દરમિયાન કૃષિ, ખાણકામ, પ્રવાસન, ઔદ્યોગિક વિકાસ જેવા મહત્વપૂર્ણ વિષયો પર સેમિનારો યોજાશે. ઉપરાંત એમએસએમઇ કોન્ક્લેવ, રિવર્સ બાયર-સેલર મીટ, બિઝનેસ ટુ બિઝનેસ (B2B) બેઠક, તેમજ વિવિધ પ્રદર્શનો અને ટ્રેડ ફેરનું આયોજન કરવામાં આવશે. આ કોન્ફરન્સ દ્વારા સ્થાનિક ઉદ્યોગોને રાષ્ટ્રીય અને આંતરરાષ્ટ્રીય બજારો સાથે જોડવાનો પ્રયાસ કરવામાં આવશે.
 

વહીવટીતંત્ર સામે પડકાર

હવે વાઇબ્રન્ટ ગુજરાત રિજનલ કોન્ફરન્સને ગણતરીના દિવસો બાકી હોવાથી, રૂડા સહિતના વિભાગો સામે સમયમર્યાદામાં દબાણો દૂર કરવાનો મોટો પડકાર છે. જો સમયસર કાર્યવાહી નહીં થાય તો વહીવટીતંત્રની કાર્યક્ષમતા પર પ્રશ્નાર્થ ઊભા થવાની શક્યતા છે.