ભારતીય ક્રિકેટમાં ફરી એકવાર કેપ્ટનશીપને લઈને ચર્ચાઓ તેજ બની છે. T20 વર્લ્ડ કપ 2026 માટે જાહેર થયેલી ભારતીય ટીમમાંથી શુભમન ગિલને બહાર રાખવામાં આવ્યા બાદ હવે તેમની વનડે કેપ્ટનશીપ પર પણ પ્રશ્નચિહ્ન ઉભું થયું છે. ક્રિકેટ જગતમાં એવી અટકળો ચાલી રહી છે કે શુભમન ગિલ પાસેથી વનડે ટીમની કેપ્ટનશીપ છીનવાઈ શકે છે અને તેના બદલે શ્રેયસ અય્યરને આ જવાબદારી સોંપવામાં આવી શકે છે.

આ વર્ષે શુભમન ગિલ માટે ઉતાર-ચઢાવ ભરેલો સમય રહ્યો છે. તેને પહેલા ટેસ્ટ ટીમ અને ત્યારબાદ વનડે ટીમનો કેપ્ટન બનાવવામાં આવ્યો હતો. એટલું જ નહીં, તે T20 ટીમનો વાઈસ-કેપ્ટન પણ હતો. પરંતુ 20 ડિસેમ્બરે T20 વર્લ્ડ કપ 2026 માટે જાહેર કરાયેલી ટીમમાં ગિલનું નામ ન હોવાને કારણે ક્રિકેટપ્રેમીઓ ચોંકી ગયા હતા. હવે આ નિર્ણય બાદ ગિલના ભવિષ્યને લઈને અનેક સવાલો ઊભા થયા છે.

આ દરમિયાન એક અહેવાલમાં દાવો કરવામાં આવ્યો છે કે શ્રેયસ અય્યરને ભારતીય વનડે ટીમનો નવો કેપ્ટન બનાવવામાં આવી શકે છે. હાલ શ્રેયસ અય્યર વનડે ટીમનો વાઈસ-કેપ્ટન છે અને તેને કેપ્ટનશીપનો ભરપૂર અનુભવ છે. તેણે ડોમેસ્ટિક ક્રિકેટ ઉપરાંત IPLમાં પણ પોતાની ટીમોની સફળ કેપ્ટનશીપ કરી છે. સોશિયલ મીડિયા પર પણ શ્રેયસ અય્યરને વનડે ટીમનો કેપ્ટન બનાવવાની માંગ અને ચર્ચા જોરશોરથી ચાલી રહી છે.

ઓક્ટોબર મહિનામાં ઓસ્ટ્રેલિયા સામેની વનડે સીરિઝ પહેલા શુભમન ગિલને વનડે ટીમનો કેપ્ટન બનાવવામાં આવ્યો હતો, જ્યારે શ્રેયસ અય્યરને વાઈસ-કેપ્ટનની જવાબદારી સોંપવામાં આવી હતી. ગિલની કેપ્ટનશીપમાં ટીમ ઈન્ડિયાએ અત્યાર સુધી ત્રણ વનડે મેચ રમી છે, જેમાંથી માત્ર એક મેચમાં જીત મળી છે. ઓસ્ટ્રેલિયા પ્રવાસ દરમિયાન ભારતે વનડે સીરિઝ 1-2થી ગુમાવી હતી. આ નબળા પરિણામોને કારણે પણ ગિલની કેપ્ટનશીપ પર સવાલો ઊભા થઈ રહ્યા છે.

જો અહેવાલો સાચા સાબિત થાય અને શ્રેયસ અય્યરને વનડે ટીમનો કેપ્ટન બનાવવામાં આવે, તો તે ભારતીય વનડે ટીમની કેપ્ટનશીપ કરનાર 29મો ખેલાડી બનશે. પસંદગીકારો વનડે વર્લ્ડ કપને ધ્યાનમાં રાખીને અનુભવ અને સ્થિરતા ધરાવતા નેતૃત્વ પર ભાર મૂકે તેવી શક્યતા છે.

T20 ફોર્મેટમાંથી શુભમન ગિલની બહારગામ પણ તેની મુશ્કેલીઓ વધારતી જણાઈ રહી છે. છેલ્લા કેટલાક મહિનાઓમાં T20I ક્રિકેટમાં તેનું પ્રદર્શન નિરાશાજનક રહ્યું છે. દક્ષિણ આફ્રિકા સામેની T20I સીરિઝમાં તેણે ત્રણ મેચમાં માત્ર 32 રન બનાવ્યા હતા. ઈજાને કારણે તે ચોથી અને પાંચમી મેચમાં નહોતો રમ્યો હોવાનું જણાવાયું હતું, પરંતુ કેટલાક અહેવાલો અનુસાર ટીમ મેનેજમેન્ટે તેને ટીમમાંથી બહાર રાખવાનો નિર્ણય પહેલેથી જ લઈ લીધો હતો. હવે સ્પષ્ટ થઈ ગયું છે કે શુભમન ગિલ 2026ના T20 વર્લ્ડ કપમાં રમશે નહીં.

આ તમામ પરિસ્થિતિઓને જોતા એવું લાગી રહ્યું છે કે વનડે વર્લ્ડ કપ પહેલા ભારતીય ટીમમાં મોટો ફેરફાર થઈ શકે છે. હવે જોવાનું એ રહેશે કે પસંદગીકારો શુભમન ગિલ પર વિશ્વાસ જાળવી રાખે છે કે પછી શ્રેયસ અય્યરને વનડે ટીમની કેપ્ટનશીપ સોંપીને નવા અધ્યાયની શરૂઆત કરે છે.