સુરત,

કાંદા અને કાશ્મીરી સફરજન ₹૮૦ પ્રતિ કિલોના એક સરખા ભાવ

ચોમાસા બાદ બેવડી ઋતુ અને ભેજવાળા હવામાનને લીધે પાકને થયેલા નુકસાનના કારણે શાકભાજીના ભાવ આસમાને પહોંચી ગયા છે અને રોજિંદા વપરાશની વસ્તુઓ ફળો કરતાં પણ મોંઘી વેચાઈ રહી છે. હાલ બજારમાં ગુણવત્તાયુક્ત કાંદા અને લાલચટક કાશ્મીરી સફરજન બંને ₹૮૦ પ્રતિ કિલોના એક સરખા ભાવે વેચાઈ રહ્યા છે.

આ ઉપરાંત શિયાળાની શરૂઆતની સિઝનના વટાણા, દેશી તથા સુરતી પાપડી, તુવેર, ગુવાર, આદુ અને લસણના ભાવ 100 રૂપિયાને વટાવી ચૂક્યા છે, જેના કારણે ગૃહિણીઓનું માસિક રસોડા બજેટ ખોરવાઈ ગયું છે. 

બીજી તરફ કેળા, પપૈયા અને મોસંબી જેવા ફળોની પૂરતી આવકને લીધે તેના ભાવ નિયંત્રણમાં છે. જથ્થાબંધ વેપારીઓ અને બજારના નિષ્ણાતોના જણાવ્યા મુજબ, દિવાળીના તહેવારો પૂર્ણ થયા બાદ નવી સિઝનલ શાકભાજીની આવક શરૂ થતાં આગામી મહિનામાં ભાવ સ્થિર થવાની શક્યતા છે.