રાજકોટ શહેરના વોર્ડ નંબર 13માં લાંબા સમયથી પ્રાથમિક સુવિધાઓનો પ્રશ્ન ગંભીર બન્યો છે. રોડ-રસ્તા, પાણી અને સફાઈ જેવી પાયાની સુવિધાઓના અભાવે સ્થાનિક લોકો પરેશાન થઈ ગયા છે. આ સમસ્યાઓને કારણે લોકોમાં તંત્ર અને સ્થાનિક જનપ્રતિનિધિઓ સામે ભારે રોષ જોવા મળી રહ્યો છે. આ જ રોષના પરિણામ સ્વરૂપે આજે મોટી સંખ્યામાં મહિલાઓ રસ્તા પર ઉતરી આવી હતી અને 150 ફૂટ રિંગ રોડ પર આવેલા ગોવર્ધન ચોક પાસે ચક્કાજામ કરીને વિરોધ નોંધાવ્યો હતો.

પ્રદર્શન દરમિયાન મહિલાઓએ સૂત્રોચ્ચાર કરીને તંત્રને જગાડવાનો પ્રયાસ કર્યો હતો. સ્થાનિક લોકોનું કહેવું છે કે વર્ષોથી રજૂઆત છતાં સમસ્યાઓનો કોઈ ઉકેલ આવ્યો નથી. હવે સ્થાનિક સ્વરાજ્યની ચૂંટણીઓ નજીક આવી રહી છે ત્યારે લોકોનો ગુસ્સો ખુલ્લેઆમ સામે આવી રહ્યો છે.
 

રોડ અને પાણીની સમસ્યાથી લોકો પરેશાન

સ્થાનિક મહિલાઓએ જણાવ્યું હતું કે વિસ્તારમાં રોડ-રસ્તાની હાલત અત્યંત ખરાબ બની ગઈ છે. અનેક રસ્તાઓ પર ખાડા પડેલા છે અને વરસાદ કે પાણી ભરાવાના કારણે સ્થિતિ વધુ ખરાબ બની જાય છે. મચ્છોમાના મંદિર પાસેનો રસ્તો તો એટલો ખરાબ બની ગયો છે કે ત્યાંથી પસાર થવું પણ મુશ્કેલ બન્યું છે.

પાણીની સમસ્યા પણ લોકોને લાંબા સમયથી સતાવી રહી છે. કેટલાક ઘરોમાં નળમાં નિયમિત પાણી આવતું નથી અને ઘણી વખત પાણી માટે લોકોને મુશ્કેલીનો સામનો કરવો પડે છે. એક મહિલાએ જણાવ્યું હતું કે તેમના ઘરમાં છ સભ્યો રહે છે છતાં પૂરતું પાણી મળતું નથી. પાણીની લાઈનો તૂટી ગઈ છે પરંતુ તેને રિપેર કરવા માટે કોઈ અધિકારી કે કર્મચારી આવતો નથી.
 

સફાઈ અને કચરાની સમસ્યાઓ પણ વધી

રોડ અને પાણી સિવાય સફાઈ વ્યવસ્થા અંગે પણ લોકોમાં ભારે અસંતોષ છે. સ્થાનિકોનું કહેવું છે કે સફાઈ કામદારો નિયમિત આવતા નથી અને કચરાવાળા પણ સમયસર સેવા આપતા નથી. જેના કારણે વિસ્તારમાં ગંદકી વધી રહી છે અને મચ્છર તથા બીમારીઓ ફેલાવાનો ભય ઊભો થયો છે.

સ્થાનિક લોકોનો આક્ષેપ છે કે મહાનગરપાલિકાએ આ વિસ્તારને અવગણ્યો છે અને વર્ષોથી અહીં વિકાસના કામો થયા નથી.
 

ચૂંટણી સમયે નેતાઓના વાયદાઓનો આરોપ

વિરોધ દરમિયાન મહિલાઓએ ચૂંટાયેલા પ્રતિનિધિઓ પર પણ આકરા આક્ષેપો કર્યા હતા. તેમનું કહેવું હતું કે જ્યારે ચૂંટણી આવે છે ત્યારે નેતાઓ રિક્ષાઓ ભરી ભરીને મત માંગવા આવે છે. તેઓ લોકો સાથે મોટા મોટા વાયદાઓ કરે છે અને કહે છે કે રસ્તા અને અન્ય વિકાસના કામો ઝડપથી થશે.

પરંતુ ચૂંટણી જીત્યા બાદ કોઈ નેતા વિસ્તારમાં જોવા મળતા નથી. અનેક વખત રજૂઆત કર્યા છતાં કોઈ નક્કર કાર્યવાહી કરવામાં આવી નથી. તેથી હવે લોકોમાં ભારે નિરાશા ફેલાઈ છે.
 

25 વર્ષથી વિકાસથી વંચિત હોવાનો આક્ષેપ

વિરોધ પ્રદર્શનમાં જોડાયેલા સ્થાનિક નાગરિક પ્રતિનિધિ મનોજભાઈ અમરેલિયાએ જણાવ્યું હતું કે છેલ્લા 20 થી 25 વર્ષથી આ વિસ્તારમાં ભાજપનું શાસન હોવા છતાં એક પણ વખત યોગ્ય રીતે રોડ બનાવવામાં આવ્યા નથી.

તેમણે કહ્યું હતું કે જ્યારે અધિકારીઓ પાસે રજૂઆત કરવામાં આવે છે ત્યારે તેઓ કોર્પોરેટરને સંપર્ક કરવા કહે છે. બીજી તરફ કોર્પોરેટરો કહે છે કે ગ્રાન્ટ મળી નથી. છેલ્લા ઘણા વર્ષોથી આ જ જવાબ મળતો રહ્યો છે. પરંતુ આટલા વર્ષોમાં ગ્રાન્ટ ક્યાં ગઈ તે પણ મોટો પ્રશ્ન છે.
 

કોર્પોરેટરો સામે લોકોનો રોષ

સ્થાનિક કોર્પોરેટર નિતીન રામાણી સહિત અન્ય પ્રતિનિધિઓ સામે પણ લોકોમાં ભારે અસંતોષ જોવા મળી રહ્યો છે. સ્થાનિકોનું કહેવું છે કે ચૂંટાયેલા પ્રતિનિધિઓને વિસ્તારના વિકાસમાં રસ નથી. આખા રાજકોટ શહેરમાં વિકાસના કામો થઈ રહ્યા છે, પરંતુ આ વિસ્તારમાં હજુ સુધી મૂળભૂત સુવિધાઓ માટે લોકો તરસી રહ્યા છે.

ગટર, પાણી અને સીસી રોડ જેવી જરૂરી સુવિધાઓના અભાવે લોકો મુશ્કેલીમાં જીવન જીવી રહ્યા છે. ઘણા લોકો કહે છે કે વિસ્તારમાં નર્ક જેવી સ્થિતિ બની ગઈ છે.
 

આંદોલન વધુ ઉગ્ર કરવાની ચીમકી

પ્રદર્શન દરમિયાન સ્થાનિક લોકોએ ચેતવણી આપી હતી કે આ ચક્કાજામ માત્ર શરૂઆત છે. જો આગામી દિવસોમાં રોડ-રસ્તા અને પાણીની સમસ્યાનો ઉકેલ નહીં આવે તો તેઓ વધુ ઉગ્ર આંદોલન કરશે.

મનોજભાઈ અમરેલિયાએ જણાવ્યું હતું કે જરૂર પડશે તો ગોંડલ ચોકડી જેવા વ્યસ્ત વિસ્તારમાં પણ ચક્કાજામ કરવામાં આવશે. લોકો હવે સમસ્યાનો કાયમી ઉકેલ માંગે છે અને ખાતરી મળ્યા વગર પીછેહઠ નહીં કરે.
 

ચક્કાજામથી ટ્રાફિક પર અસર

આ ચક્કાજામને કારણે 150 ફૂટ રિંગ રોડ પર વાહનોની લાંબી કતારો લાગી ગઈ હતી. અનેક વાહનચાલકોને મુશ્કેલીનો સામનો કરવો પડ્યો હતો. જોકે પ્રદર્શન કરી રહેલી મહિલાઓએ સ્પષ્ટ કહ્યું હતું કે જ્યાં સુધી તંત્ર તરફથી નક્કર પગલાં લેવામાં નહીં આવે ત્યાં સુધી તેઓ શાંતિથી બેસવાના નથી.

હવે જોવાનું એ રહેશે કે રાજકોટ મહાનગરપાલિકા આ લોકોની સમસ્યાઓને ધ્યાનમાં લઈને તાત્કાલિક કામગીરી શરૂ કરે છે કે પછી સ્થાનિક લોકોને ફરી લાંબી રાહ જોવી પડશે.