દોહા ખાતે રમાઈ રહેલી FIDE વર્લ્ડ બ્લિટ્ઝ ચેમ્પિયનશિપ 2025 દરમિયાન ચેસ જગતને હચમચાવી દે તેવી ઘટના સામે આવી છે. ભારતના 22 વર્ષીય યુવા ગ્રાન્ડમાસ્ટર અર્જુન એરિગૈસીએ વિશ્વના નંબર-1 ખેલાડી અને પાંચ વખતના વર્લ્ડ ચેમ્પિયન મેગ્નસ કાર્લસનને પરાજય આપતા રમતપ્રેમીઓમાં ભારે ચર્ચા જગાવી છે. આ હાર બાદ કાર્લસન પોતાનો ગુસ્સો કાબૂમાં રાખી શક્યા નહોતા અને ગુસ્સામાં ટેબલ પર જોરદાર મુક્કો માર્યો હતો, જેનો વીડિયો હવે સોશિયલ મીડિયા પર ઝડપથી વાઇરલ થઈ રહ્યો છે.

દોહામાં યોજાયેલી આ બ્લિટ્ઝ ચેમ્પિયનશિપના નવમા રાઉન્ડમાં આ ઐતિહાસિક મુકાબલો થયો હતો. ખાસ વાત એ છે કે અર્જુન એરિગૈસી આ મેચમાં બ્લેક પીસ (કાળા મહોરા) સાથે રમી રહ્યા હતા. સામાન્ય રીતે ચેસમાં સફેદ મહોરા ધરાવતા ખેલાડીને પહેલ કરવાની અને આક્રમક રમત રમવાની વધુ તક મળતી હોય છે, પરંતુ અર્જુને કાર્લસનની દરેક ચાલનો અત્યંત ધીરજ અને ચોકસાઈથી જવાબ આપ્યો.

શરૂઆતમાં કાર્લસને પોતાની પરંપરાગત આક્રમક શૈલી અપનાવી હતી, પરંતુ અર્જુને એક પણ ભૂલ કર્યા વિના રમતને સંતુલિત રાખી. સમય જતા અર્જુનનો દબદબો વધતો ગયો અને કાર્લસન સતત દબાણમાં આવી ગયા. અંતે સમયની અછત અને અર્જુનની મજબૂત સ્થિતિ સામે કાર્લસન હાર સ્વીકારવા મજબૂર બન્યા.

આ હાર કાર્લસન માટે માત્ર એક મેચની હાર નહોતી, પરંતુ તેમની પ્રતિષ્ઠાને મોટો આઘાત સમાન હતી. પરિણામ જાહેર થતા જ કાર્લસન ગુસ્સામાં આવી ગયા અને ટેબલ પર મુક્કો માર્યો. આ સમગ્ર દૃશ્ય કેમેરામાં કેદ થઈ ગયું અને થોડા જ સમયમાં સોશિયલ મીડિયા પર વાયરલ થયું. ચેસપ્રેમીઓમાં કાર્લસનની આ રમત બહારની પ્રતિક્રિયા અંગે મિશ્ર પ્રતિસાદ જોવા મળી રહ્યો છે.

અર્જુન એરિગૈસી માટે આ જીત ખૂબ જ મહત્વપૂર્ણ સાબિત થઈ છે. આ વિજય સાથે અર્જુન 7.5 પોઈન્ટ સાથે પોઈન્ટ ટેબલમાં ઉઝબેકિસ્તાનના નોદિરબેક અબ્દુસત્તોરોવ સાથે સંયુક્ત રીતે પ્રથમ સ્થાને પહોંચી ગયા છે. થોડા સમય અગાઉ યોજાયેલી વર્લ્ડ રેપિડ ચેમ્પિયનશિપમાં કાર્લસને ગોલ્ડ મેડલ જીત્યો હતો, જ્યારે અર્જુને બ્રોન્ઝ મેડલ મેળવી પોતાની પ્રતિભાનો પરચો આપ્યો હતો. હવે બ્લિટ્ઝ ફોર્મેટમાં પણ અર્જુને સાબિત કરી દીધું છે કે તે વિશ્વના શ્રેષ્ઠ ખેલાડીઓમાં સ્થાન મેળવવા સંપૂર્ણ રીતે તૈયાર છે.

મેગ્નસ કાર્લસનનો ગુસ્સો પહેલી વાર ચર્ચામાં આવ્યો નથી. જૂન 2025માં ભારતના જ યુવા ગ્રાન્ડમાસ્ટર ડી. ગુકેશ સામે હાર્યા બાદ પણ કાર્લસને આવું જ અસંતુલિત વર્તન દર્શાવ્યું હતું. આ સિવાય, આ જ ટૂર્નામેન્ટના રેપિડ વિભાગમાં એક રશિયન ખેલાડી સામે હાર્યા બાદ તેમણે કેમેરાને ધક્કો માર્યો હોવાની ઘટના પણ સામે આવી હતી. આવા પ્રસંગો કાર્લસનની રમત બહારની પ્રતિક્રિયાઓ પર સવાલ ઊભા કરે છે.

બીજી તરફ, અર્જુન એરિગૈસીની શાંતિપૂર્ણ અને આત્મવિશ્વાસથી ભરેલી રમતની સમગ્ર વિશ્વમાં પ્રશંસા થઈ રહી છે. ભારતીય ચેસ માટે આ ક્ષણ ગૌરવપૂર્ણ છે, કારણ કે યુવા ખેલાડીઓ સતત વિશ્વ સ્તરે દિગ્ગજોને પડકાર આપી રહ્યા છે.

આ જીત માત્ર એક મેચની જીત નથી, પરંતુ ભારતીય ચેસના ભવિષ્ય માટે એક સકારાત્મક સંકેત છે. અર્જુન એરિગૈસી જેવા ખેલાડીઓના કારણે આજે ભારત ચેસની વૈશ્વિક મહાસત્તા તરીકે ઉભરી રહ્યું છે, અને આવનારા સમયમાં વધુ મોટી સિદ્ધિઓની આશા વધુ મજબૂત બની છે.