આંતરરાષ્ટ્રીય કક્ષાની રમતગમત સ્પર્ધાઓને ધ્યાનમાં રાખીને અમદાવાદ શહેરમાં વિશ્વસ્તરીય ‘Sardar Patel Sports Enclave’નો માસ્ટર પ્લાન તૈયાર કરવામાં આવ્યો છે. Narendra Modi Stadiumની આસપાસ આશરે 350 એકર વિસ્તારમાં વિકસાવવામાં આવનાર આ વિશાળ પ્રોજેક્ટમાં ભારતનું સૌથી મોટું ઇન્ડોર એરેના, આધુનિક એક્વેટિક સેન્ટર, ઇન્ટરનેશનલ ટેનિસ સેન્ટર અને નેશનલ ઇન્સ્ટિટ્યૂટ ઓફ સ્પોર્ટ્સ એક્સેલન્સ (NISE)નું નિર્માણ કરવામાં આવશે.

ગુજરાતમાં કોમનવેલ્થ તેમજ વર્લ્ડ પોલીસ એન્ડ ફાયર ગેમ્સ જેવી આંતરરાષ્ટ્રીય સ્પર્ધાઓ યોજાવાની સંભાવનાને ધ્યાનમાં રાખીને આ એન્ક્લેવની રચના કરવામાં આવી છે. BDP, Cox Architecture અને Collage Designના કન્સોર્ટિયમ દ્વારા આ ભવ્ય માસ્ટર પ્લાન તૈયાર કરવામાં આવ્યો છે. સમગ્ર ડિઝાઇનમાં આધુનિકતા સાથે ગુજરાતની સાંસ્કૃતિક ઓળખ પણ ઝલકશે.
 

ઇન્ટરનેશનલ ટેનિસ સેન્ટર: દેશનું પ્રથમ અનોખું કેન્દ્ર

આ એન્ક્લેવમાં બનાવવામાં આવનાર ઇન્ટરનેશનલ ટેનિસ સેન્ટર ભારત માટે એક મહત્વપૂર્ણ ઉમેરો સાબિત થશે. અહીં 10 હજાર પ્રેક્ષકોની ક્ષમતા ધરાવતું સેન્ટર કોર્ટ, ઉપરાંત 5 હજાર અને 3 હજાર સીટના શો કોર્ટ્સ બનાવાશે. ટેનિસ સેન્ટરની છત ફ્લોટિંગ ફેબ્રિક માળખામાં હશે, જે કુદરતી પ્રકાશ અને છાંયો જાળવી રાખશે.

આ સંકુલ માત્ર ટુર્નામેન્ટ પૂરતું સીમિત નહીં રહે, પરંતુ ટેનિસ ક્લબ તરીકે પણ વિકસિત થશે. ઇન્ડોર અને આઉટડોર કોર્ટ્સ સાથે હોસ્પિટાલિટી સુવિધાઓ ઉભી કરવામાં આવશે, જેથી સ્થાનિક તેમજ આંતરરાષ્ટ્રીય ખેલાડીઓને ઉત્તમ સુવિધાઓ મળી શકે.

 

NISE: ખેલાડીઓ માટે ‘સ્પોર્ટિંગ આશ્રમ’

ટેનિસ સેન્ટર અને મોદી સ્ટેડિયમ વચ્ચે ‘નેશનલ ઇન્સ્ટિટ્યૂટ ઓફ સ્પોર્ટ્સ એક્સેલન્સ’ (NISE) ઉભું કરાશે. તેને ‘સ્પોર્ટિંગ આશ્રમ’ તરીકે ઓળખાવવામાં આવી રહ્યું છે. અહીં ભાવિ ખેલાડીઓ માટે ઉચ્ચ કક્ષાની ટ્રેનિંગ, જીમ્નેશિયમ, રિકવરી ઝોન અને બાયો-મેડિકલ સુવિધાઓ ઉપલબ્ધ રહેશે.

આ સંસ્થાનો હેતુ માત્ર સ્પર્ધાઓ યોજવાનો નહીં, પરંતુ ખેલાડીઓના સર્વાંગી વિકાસ પર ભાર મૂકવાનો છે. આધુનિક સ્પોર્ટ્સ સાયન્સ અને મેડિકલ સપોર્ટ સાથે ખેલાડીઓને આંતરરાષ્ટ્રીય સ્તર સુધી તૈયાર કરવામાં આવશે.
 

ભારતનું સૌથી મોટું ઇન્ડોર એરેના

એન્ક્લેવના પૂર્વ ભાગમાં 18 હજાર પ્રેક્ષકોની ક્ષમતા ધરાવતું ભારતનું સૌથી મોટું ઇન્ડોર એરેના નિર્માણ પામશે. અહીં જિમ્નાસ્ટિક્સ, બાસ્કેટબોલ, કબડ્ડી જેવી રમતો ઉપરાંત સંગીત સમારંભો અને સાંસ્કૃતિક કાર્યક્રમો પણ યોજી શકાશે.

ઇન્ડોર એરેનાની ડિઝાઇનમાં પરંપરાગત ઝરોખા અને છજ્જા જેવી આર્કિટેક્ચરલ શૈલીનો સ્પર્શ હશે, જે આધુનિક માળખામાં ભારતીય વારસાની ઓળખ રજૂ કરશે.
 

આંતરરાષ્ટ્રીય એક્વેટિક સેન્ટર

પશ્ચિમ છેડે, મોદી સ્ટેડિયમની બાજુમાં અત્યાધુનિક એક્વેટિક સેન્ટર બનાવાશે. અહીં 12 હજાર પ્રેક્ષકો બેસી શકે તેવી વ્યવસ્થા રહેશે. સ્વિમિંગ, ડાઇવિંગ અને સિંક્રનાઇઝ્ડ સ્વિમિંગ જેવી આંતરરાષ્ટ્રીય સ્પર્ધાઓ યોજી શકાય તેવી સુવિધાઓ ઉપલબ્ધ રહેશે.

એક્વેટિક સેન્ટરની ડિઝાઇન દિવાળીમાં સાબરમતી નદીમાં તરતા લાલટેનથી પ્રેરિત છે. આ અનોખી રચના રાત્રે વિશેષ લાઇટિંગ સાથે શહેરની નવી ઓળખ બની શકે છે.
 

રિવરફ્રન્ટ પર ગેમ્સ પ્લાઝા અને અર્બન પાર્ક

Sabarmati Riverfrontને સેન્ટ્રલ ગેમ્સ પ્લાઝા તરીકે વિકસાવવામાં આવશે. મોટા ઇવેન્ટ્સ બાદ આખું વર્ષ અહીં ડાઇનિંગ ઝોન, કોમ્યુનિટી સ્પોર્ટ્સ કોર્ટ્સ અને અર્બન પાર્ક તરીકે ઉપયોગ થઈ શકશે. બાયોડાયવર્સ પાર્ક શહેરના ‘ફેફસાં’ સમાન બની હરિયાળી જાળવવામાં મદદરૂપ થશે.
 

રોજગારી અને વિકાસની તક

કોમનવેલ્થ ગેમ્સ જેવા મેગા ઇવેન્ટ્સને ધ્યાનમાં રાખીને શહેરમાં હોસ્પિટાલિટી અને રિટેલ ક્ષેત્રમાં 20 હજારથી વધુ નોકરીઓ સર્જાવાની શક્યતા છે. આ પ્રોજેક્ટ માત્ર રમતગમત પૂરતો સીમિત નહીં રહી શહેરના આર્થિક વિકાસમાં પણ મહત્વની ભૂમિકા ભજવશે.

માસ્ટર પ્લાન ચાર મુખ્ય સિદ્ધાંતો પર આધારિત છે—આબોહવા પ્રત્યે પ્રતિભાવ, પ્રકૃતિ સાથે જોડાણ, આધુનિક આર્કિટેક્ચર અને ટકાઉ વારસો. મોદી સ્ટેડિયમની આસપાસ ગાર્ડન અને ખુલ્લા પ્લાઝા બનાવી હરિયાળી જાળવવાનો ખાસ ભાર મૂકાયો છે.

આ રીતે, સરદાર પટેલ સ્પોર્ટ્સ એન્ક્લેવ અમદાવાદને વૈશ્વિક રમતગમતના નકશા પર મજબૂત સ્થાન અપાવશે અને શહેરને આધુનિક સ્પોર્ટ્સ હબ તરીકે ઓળખ અપાવશે.