રાજધાની દિલ્હીના લાલ કિલ્લા પાસે થયેલા ભીષણ કાર બ્લાસ્ટે આખા દેશમાં ચકચાર મચાવી દીધી છે. આ વિસ્ફોટમાં અત્યાર સુધી 10 લોકોના મોત નિશ્ચિત થયા છે, જેમાંથી માત્ર 8 મૃતદેહોની ઓળખ થઈ શકી છે. બાકીના બે મૃતદેહોની ઓળખ તપાસ એજન્સીઓ માટે મોટો પડકાર બની ગઈ છે, કારણ કે એક મૃતદેહનું માથું જ મળ્યું નથી અને બીજો માત્ર શરીરના ટુકડાઓના રૂપમાં મળ્યો છે.

તપાસ એજન્સીઓએ સ્પષ્ટ કર્યું છે કે હવે આ બંને મૃતદેહોની ઓળખ માટે DNA ટેસ્ટ જ એકમાત્ર વિકલ્પ છે. તપાસના ભાગરૂપે મુખ્ય સૂત્રધાર ડૉ. ઉમર મોહમ્મદની માતાનું DNA નમૂનું લેવામાં આવ્યું છે, જેથી મળી આવેલા અજાણ્યા શરીરના ટુકડાઓ સાથે તેની તુલના કરી શકાય. જો મેચ થશે, તો સ્પષ્ટ થશે કે ડૉ. ઉમર પણ આ વિસ્ફોટમાં જ મૃત્યુ પામ્યો છે.

અકસ્માત કે આતંકી વિસ્ફોટ?

પ્રારંભિક તપાસ મુજબ, આ બ્લાસ્ટ કોઈ “ભૂલથી થયેલો વિસ્ફોટ” હોવાનું અનુમાન છે. તપાસ એજન્સીઓનું માનવું છે કે ફરીદાબાદમાં આંતરરાજ્ય આતંકી ગેંગના પર્દાફાશ બાદ ડૉ. ઉમર ગભરાઈ ગયો હતો અને ઉતાવળમાં બનાવેલો એક્સપ્લોઝિવ ઉપકરણ એક જગ્યાએથી બીજી જગ્યાએ ખસેડી રહ્યો હતો. એ સમયે જ વિસ્ફોટ થઈ ગયો હોવાની શક્યતા છે.

CCTVમાં શું દેખાયું?

CCTV ફૂટેજમાં સ્પષ્ટ થયું છે કે બ્લાસ્ટ સમયે i20 કારમાં ઉમર મોહમ્મદ એકલો જ હતો. વિસ્ફોટ એટલો જોરદાર હતો કે કાર જમીનથી ઘણા ફૂટ ઊંચે ઉછળી ગઈ અને નજીકની પોલીસ ચોકીની દીવાલ તથા છતને નુકસાન થયું હતું.

બ્લાસ્ટ પહેલા ઉમરનું વર્તન

પોલીસ તપાસમાં ખુલ્યું છે કે ઉમર બ્લાસ્ટ પહેલા લગભગ ત્રણ કલાક સુધી સુનહરી મસ્જિદની પાર્કિંગમાં પોતાની કારમાં બેઠો હતો અને ઇન્ટરનેટ પર પોતાના સાથી આતંકવાદીઓની ધરપકડ વિશેની માહિતી શોધી રહ્યો હતો. તેની કારના 11 કલાકના રૂટનો ટ્રેક પણ એજન્સીઓએ મેળવી લીધો છે.

ઓળખાયેલા 8 મૃતદેહોની યાદી

1. મોહસિન – મેરઠ નિવાસી
2. અશોક કુમાર – બસ કંડક્ટર, અમરોહા
3. લોકેશ – અમરોહા
4. દિનેશ મિશ્રા – શ્રાવસ્તી
5. પંકજ – ઓલા-ઉબર ડ્રાઇવર
6. અમર કટારિયા – શ્રીનિવાસપુરી
7. નૌમાન અંસારી – રિક્ષાચાલક
8. મોહમ્મદ જુમ્માન – રિક્ષાચાલક

તપાસમાં અત્યાર સુધી બ્લાસ્ટના કારણો અંગે સ્પષ્ટતા થઈ નથી, પરંતુ એનઆઈએ, દિલ્હી પોલીસ અને અન્ય તપાસ એજન્સીઓ દરેક ખૂણેથી પુરાવા એકત્ર કરી રહી છે. હાલ દેશની રાજધાનીમાં સુરક્ષા વધારાઈ છે અને લાલ કિલ્લા વિસ્તારને સાવચેતીરૂપે સીલ કરવામાં આવ્યો છે.