સૌરાષ્ટ્રના ખેડૂતો હાલ એક પછી એક મુશ્કેલીઓનો સામનો કરી રહ્યા છે. ભારે વરસાદના કારણે મગફળીના પાકમાં મોટા પ્રમાણમાં નુકસાન થયું છે, જેના કારણે ખેડૂતોને નાણાકીય સંકટનો સામનો કરવો પડી રહ્યો છે. બીજી તરફ, માર્કેટિંગ યાર્ડોમાં ખેડૂતોને મગફળીના પૂરતા ભાવ મળતા નથી અને વચેટીયા તેમજ કમિશન એજન્ટો (દલાલો) ખેડૂતો પાસેથી કમિશન વસૂલતા હોવાથી ખેડૂતો વધુ મુશ્કેલીમાં ફસાઈ રહ્યા છે.

રાજ્ય સરકાર દ્વારા મગફળીના ટેકાના ભાવ 1452 રૂપિયા પ્રતિ 20 કિલો જાહેર કરવામાં આવ્યા હોવા છતાં, હાલમાં ખેડૂતોને ખુલ્લા બજારમાં ફક્ત 900 થી 1150 રૂપિયાના ભાવ મળી રહ્યા છે. આ વચ્ચે કોંગ્રેસે ખેડૂતોના પ્રશ્નોને લઈને સરકાર સામે આક્રોશ વ્યક્ત કર્યો છે અને અનેક માગણીઓ રજૂ કરી છે.

કોંગ્રેસના નેતા અમિત ચાવડાએ જણાવ્યું કે —

“સૌરાષ્ટ્રમાં થયેલા ભારે વરસાદને કારણે ખેડૂતોના પાકનું વિશાળ નુકસાન થયું છે. રાજ્ય સરકારે તાત્કાલિક પાક સર્વે શરૂ કરવો જોઈએ અને ખેડૂતો માટે વિશેષ રાહત પેકેજ જાહેર કરવું જોઈએ.”

તેમણે વધુમાં ઉમેર્યું કે ખેડૂતોને પાક વીમા યોજનાનો લાભ તાત્કાલિક આપવા માટે નવી જાહેરાત કરવામાં આવે અને જે ખેડૂતો હાલ બેન્ક લોન ભરવા અસમર્થ છે, તેમના ધિરાણ માફ કરાય.

કામચલાઉ ટેકાના ભાવે મગફળી ખરીદી માટે સરકારે માત્ર 70 મણ પ્રતિ ખેડૂત ખરીદની મર્યાદા નક્કી કરી છે, જેના વિરોધમાં કોંગ્રેસે કડક વલણ અપનાવ્યું છે. કોંગ્રેસનું કહેવું છે કે —

“70 મણ ખરીદી કરીને સરકાર શું કરશે? બાકી રહેલી મગફળી ખેડૂતો ક્યાં વેંચશે? સરકારે ઓછામાં ઓછી 300 મણ સુધી ખરીદી કરવાની વ્યવસ્થા કરવી જોઈએ.”

ઉપરાંત, વરસાદના કારણે જમીન ધોવાણથી થયેલા નુકસાન માટે ખેડૂતોને વળતર આપવા સરકાર તાત્કાલિક નિર્ણય લે તે પણ કોંગ્રેસની મુખ્ય માંગ છે.

આ મુદ્દાઓને લઈને કોંગ્રેસે ખેડૂત આંદોલનનો ધમધમાટ શરૂ કર્યો છે. આવતીકાલે બોટાદ ખાતે વિશાળ ખેડૂત સંમેલન યોજાશે, જેમાં પ્રદેશ પ્રમુખ અમિત ચાવડા સહીત અનેક કોંગ્રેસ નેતાઓ હાજરી આપશે.

ચાવડાએ કહ્યું છે કે —

“જો સરકાર ખેડૂતોના હક્કની અવગણના કરશે, તો કોંગ્રેસ રાજ્યવ્યાપી ખેડૂત આંદોલન કરશે. એક પણ મંત્રીને ગામડામાં પ્રવેશ કરવાની મંજૂરી આપવામાં નહીં આવે.”

ખેડૂતોના પ્રશ્નોને લઈ સૌરાષ્ટ્રમાં તાપમાન વધી ગયું છે. એક તરફ સરકાર ખરીદીની પ્રક્રિયા શરૂ કરવાની વાત કરી રહી છે, જ્યારે બીજી તરફ ખેડૂતો નારાજ છે કે ટેકાના ભાવના આશરે ત્રણ-ચારસો રૂપિયા ઓછા ભાવે પોતાની મગફળી વેચવાની ફરજ પડી રહી છે.

હવે જોવાનું એ રહેશે કે બોટાદના કોંગ્રેસના આ ખેડૂત સંમેલન પછી રાજ્ય સરકાર ખેડૂતો માટે કોઈ રાહત પગલા લે છે કે નહીં, અથવા ફરી એકવાર ખેડૂતોના હક્ક માટે સંઘર્ષ વધશે.