રાજકોટ,

રાજકોટ હેડ પોસ્ટ ઓફિસમાં રાખડી મોકલવા માટે વિશેષ કાઉન્ટર પર 10% ડિસ્કાઉન્ટ

પવિત્ર રક્ષાબંધનના પર્વને ધ્યાનમાં રાખીને રાજકોટની હેડ પોસ્ટ ઓફિસ દ્વારા બહેનો માટે એક વિશેષ સુવિધા જાહેર કરવામાં આવી છે. દૂર રહેતા ભાઈઓને રાખડી મોકલવાની પ્રક્રિયા સરળ અને ઝડપી બને તે માટે પોસ્ટ ઓફિસ દ્વારા અલગથી ખાસ કાઉન્ટર શરૂ કરવામાં આવ્યું છે.

સામાન્ય દિવસોમાં પોસ્ટ ઓફિસમાં ભીડને કારણે બુકીંગ કરાવવા માટે લાંબી લાઈનોમાં ઉભા રહેવું પડતું હોય છે. પરંતુ રક્ષાબંધન પર્વ નિમિત્તે શરૂ કરાયેલા આ સ્પેશિયલ કાઉન્ટર પર બહેનોને કોઈ પણ પ્રકારના ટોકન કે લાઈનમાં ઉભા રહ્યા વિના સીધું જ બુકીંગ કરવાની સુવિધા મળશે. આ વ્યવસ્થાના કારણે બહેનોનો કિંમતી સમય બચશે અને તેઓ સરળતાથી રાખડી રવાના કરી શકશે.

ટોકન કે લાઈનની ઝંઝટમાંથી મુક્તિ

પોસ્ટ વિભાગ દ્વારા બહેનોને આર્થિક પ્રોત્સાહન આપવા માટે એક વિશેષ ઓફર પણ આપવામાં આવી છે. જો કોઈ પણ બહેન રાખડી મોકલવા માટે 'સ્પીડ પોસ્ટ' સેવાનો ઉપયોગ કરશે, તો તેમને પોસ્ટલ ચાર્જમાં સીધું 10% ડિસ્કાઉન્ટ આપવામાં આવશે. સમયસર અને સુરક્ષિત રીતે રાખડી ભાઈ સુધી પહોંચાડવા માટે પોસ્ટ વિભાગની આ પહેલ ખૂબ જ સરાહનીય છે. રાજકોટના નાગરિકો, ખાસ કરીને બહેનોને આ સુવિધાનો લાભ લેવા માટે હેડ પોસ્ટ ઓફિસની મુલાકાત લેવા અપીલ કરવામાં આવી છે.