રાજકોટ,

​ચાર નવી વોલ્વો બસના બ્રાન્ડિંગના નામે જાહેર માર્ગ પર ટ્રાફિકને અડચણરૂપ બની કરાઈ બેફામ ઉજવણી

રાજકોટના જાણીતા અટલ સરોવર વિસ્તાર પાસે એક ચોંકાવનારી ઘટના સામે આવી છે, જ્યાં એક ટ્રાવેલ્સ ઓપરેટર દ્વારા પોતાની ચાર નવી વોલ્વો બસના બ્રાન્ડિંગ અને સ્વાગત અર્થે જાહેર માર્ગ પર જ બેફામ દ્રશ્યો સર્જવામાં આવ્યા હતા.

​પ્રાપ્ત માહિતી અનુસાર, સુદામા ટ્રાવેલ્સના સંચાલકો દ્વારા ચાર નવી આધુનિક વોલ્વો બસોને લાવવામાં આવી હતી. આ બસોના બ્રાન્ડિંગ અને લોકાર્પણની ખુશીમાં સંચાલકો અને તેમના સમર્થકોએ કોઈ પણ પ્રકારની પરવાનગી કે શિસ્ત વગર સીધા જ ચાલુ રસ્તા વચ્ચે બસો આડી-અવળી પાર્ક કરી દીધી હતી. અડધો રસ્તો રોકીને ઊભી રાખેલી આ બસોના કારણે પાછળથી આવતા અન્ય વાહનચાલકોને ભારે મુશ્કેલીનો સામનો કરવો પડ્યો હતો.

​માત્ર રસ્તો રોકવા પૂરતું સીમિત ન રહેતા, આ ઉત્સવના માહોલમાં રોડની વચ્ચે જ ટેબલ મૂકીને મોટી કેક કાપવામાં આવી હતી અને જાહેરમાં જોરશોરથી ફટાકડા ફોડવામાં આવ્યા હતા. અટલ સરોવર જેવા વ્યસ્ત અને જાહેર સ્થળે થયેલી આ પ્રકારની બેજવાબદાર ઉજવણીના કારણે ત્યાંથી પસાર થતા સામાન્ય નાગરિકો અને રાહદારીઓમાં રોષ જોવા મળ્યો હતો.

​આ ઘટનાના દ્રશ્યો સોશિયલ મીડિયા પર વાયરલ થતાં પોલીસ તંત્ર અને ટ્રાફિક શાખાની કામગીરી સામે પણ સવાલો ઉભા થયા છે. જાહેર માર્ગો પર ટ્રાફિકને અવરોધીને આ રીતે જોખમી ઉજવણી કરનાર સંબંધિત ટ્રાવેલ્સ સંચાલક સામે ટ્રાફિક પોલીસ દ્વારા કડક દાખલારૂપ પગલાં લેવામાં આવે તેવી લોકમાં માંગ ઊઠી છે.