બોલિવૂડમાં ફરી એકવાર એક સફળ જોડીએ ચર્ચાનો વિષય બન્યો છે. અક્ષય કુમાર અને જાણીતા કોમેડી ડાયરેક્ટર અનીસ બઝમી 15 વર્ષ પછી ફરી સાથે કામ કરવા જઈ રહ્યા છે. છેલ્લા કેટલાક સમયથી આ બંને વચ્ચે નવી ફિલ્મને લઈને અટકળો ચાલી રહી હતી, પરંતુ હવે ખુદ અનીસ બઝમીએ આ વાતને સત્તાવાર રીતે કન્ફર્મ કરી દીધી છે. અનીસ બઝમી અક્ષય કુમારને લઈને એક નવી કોમેડી ફિલ્મ બનાવવા જઈ રહ્યા છે, જેને લઈને ફિલ્મી જગતમાં ઉત્સાહ જોવા મળી રહ્યો છે.

અક્ષય કુમાર અને અનીસ બઝમીની જોડી અગાઉ પણ બોક્સ ઓફિસ પર કમાલ કરી ચૂકી છે. વર્ષ 2007માં આવેલી ‘વેલકમ’ અને 2008ની ‘સિંઘ ઇઝ કિંગ’ જેવી ફિલ્મોએ દર્શકોને ભરપૂર મનોરંજન આપ્યું હતું અને બંને ફિલ્મો સુપરહિટ સાબિત થઈ હતી. ત્યારબાદ 2011માં ‘થેન્ક યુ’ ફિલ્મમાં અક્ષય કુમાર છેલ્લે અનીસ બઝમી સાથે જોવા મળ્યો હતો. હવે લગભગ દોઢ દાયકાના અંતર બાદ આ બંને ફરી સાથે કામ કરી રહ્યા છે, જે બોલિવૂડ પ્રેમીઓ માટે ખુશખબર સમાન છે.

છેલ્લા કેટલાક વર્ષોમાં અક્ષય કુમારની કારકિર્દી મુશ્કેલીના સમયમાંથી પસાર થઈ રહી છે. એક પછી એક ફિલ્મો રિલીઝ થવા છતાં બોક્સ ઓફિસ પર તે ખાસ અસર છોડી શકી નથી. સામાજિક સંદેશાવાળી અને ગંભીર વિષયવાળી ફિલ્મોમાં કામ કર્યા બાદ હવે અક્ષય ફરી પોતાની મજબૂત પકડ ધરાવતા કોમેડી જોનર તરફ વળ્યો છે. કોમેડી ફિલ્મોમાં તેની ટાઇમિંગ, એનર્જી અને સ્ક્રીન પ્રેઝન્સ હંમેશા દર્શકોને પસંદ પડતી આવી છે. તેથી અનીસ બઝમી જેવા અનુભવી ડાયરેક્ટર સાથે ફરી કામ કરવાનો તેનો નિર્ણય કારકિર્દી માટે મહત્વપૂર્ણ માનવામાં આવી રહ્યો છે.

અનીસ બઝમી બોલિવૂડમાં કોમેડી અને ફેમિલી એન્ટરટેઇનમેન્ટ માટે જાણીતા ડાયરેક્ટર છે. ‘નોએન્ટ્રી’, ‘વેલકમ’, ‘સિંઘ ઇઝ કિંગ’, ‘રેડી’, ‘મુબારકાં’ અને ‘ભૂલ ભૂલૈયા 2’ જેવી ફિલ્મો દ્વારા તેમણે પોતાની અલગ ઓળખ બનાવી છે. તેમની ફિલ્મોમાં હલકી-ફુલકી કોમેડી, મજબૂત પાત્રો અને મનોરંજક કહાની જોવા મળે છે. અક્ષય કુમાર સાથે તેમનું કામ હંમેશા સફળ રહ્યું છે, જેના કારણે નવી ફિલ્મ પાસેથી પણ મોટી અપેક્ષા રાખવામાં આવી રહી છે.

હાલમાં અનીસ બઝમીએ ફિલ્મની જાહેરાત તો કરી છે, પરંતુ તેના ટાઈટલ અને કાસ્ટ વિશે કોઈ માહિતી જાહેર કરી નથી. ફિલ્મમાં અક્ષય કુમાર સિવાય અન્ય કયા કલાકારો હશે તે અંગે પણ સસ્પેન્સ જાળવવામાં આવ્યું છે. જોકે, માનવામાં આવી રહ્યું છે કે આ ફિલ્મ સંપૂર્ણ રીતે મનોરંજનથી ભરપૂર હશે અને તેમાં ક્લાસિક અનીસ બઝમી સ્ટાઇલની કોમેડી જોવા મળશે.

બોલિવૂડ ટ્રેડ એનાલિસ્ટ્સનું માનવું છે કે અક્ષય કુમાર માટે આ ફિલ્મ એક ટર્નિંગ પોઈન્ટ સાબિત થઈ શકે છે. તેની ફેન ફોલોઇંગ હજુ પણ મજબૂત છે અને જો તેને યોગ્ય સ્ક્રિપ્ટ અને યોગ્ય ડાયરેક્ટર મળે તો તે ફરી બોક્સ ઓફિસ પર દમદાર વાપસી કરી શકે છે. અનીસ બઝમી સાથેની તેની જૂની સફળતા જોતા દર્શકોને પણ આ જોડીએ ફરી સ્ક્રીન પર કમાલ કરવી જોઈએ તેવી અપેક્ષા છે.

ફિલ્મી વર્તુળોમાં એવી ચર્ચા પણ ચાલી રહી છે કે આ પ્રોજેક્ટ 2026માં ફ્લોર પર જશે અને ત્યારબાદ જ તેની રિલીઝ તારીખ જાહેર કરવામાં આવશે. હાલ તો માત્ર એટલું જ કહી શકાય કે 15 વર્ષ પછી અક્ષય કુમાર અને અનીસ બઝમીનું ફરી એકવાર સાથે આવવું બોલિવૂડ માટે એક મોટી ઘટના છે.

આ જોડીએ અગાઉ જે રીતે દર્શકોને હસાવ્યા હતા, તે જ રીતે હવે ફરી એકવાર સિનેમાઘરોમાં હાસ્યની લહેર લાવવાની તૈયારી શરૂ થઈ ગઈ છે. હવે સૌની નજર આ ફિલ્મના ટાઈટલ, કાસ્ટ અને રિલીઝ ડેટ પર ટકેલી છે.