અમેરિકા અને ભારત વચ્ચેની વ્યૂહાત્મક ભાગીદારીને વધુ મજબૂત બનાવવા માટે એક મહત્વપૂર્ણ પગલું ભરવામાં આવ્યું છે. અમેરિકાએ ભારતને 93 મિલિયન ડૉલરના સંરક્ષણ હથિયારોના વેચાણને સત્તાવાર મંજૂરી આપી દીધી છે, જેને બંને દેશો વચ્ચેના રક્ષણ સંબંધોમાં એક નવો માઈલસ્ટોન માનવામાં આવી રહ્યો છે.

ભારતને કયા હથિયારો મળશે?

અમેરિકાની ડિફેન્સ સિક્યુરિટી કો-ઓપરેશન એજન્સી (DSCA) દ્વારા કોંગ્રેસને પાઠવેલી સૂચના મુજબ, આ પેકેજમાં નીચેના અદ્યતન હથિયારોનો સમાવેશ થાય છે:

• 100 FGM-148 જેવેલિન એન્ટી-ટેન્ક મિસાઇલો
• 25 લાઈટ કમાન્ડ લોન્ચ યુનિટ (LCLU)
• 216 એક્સકેલિબર પ્રિસિઝન-ગાઇડેડ આર્ટિલરી રાઉન્ડ્સ – જેનું મૂલ્ય લગભગ 47 મિલિયન ડૉલર છે
• સાથે સાથે ઓપરેટર તાલીમ, સલામતી નિરીક્ષણ, સપોર્ટ સેવાઓ અને અન્ય લોજિસ્ટિક મદદનો પણ સમાવેશ કરવામાં આવ્યો છે.

આ અદ્યતન હથિયારો ભારતીય ભૂમિસેનાની મેદાની લડાઈ ક્ષમતામાં નોંધપાત્ર અને ગુણાત્મક વધારો કરશે.

પાકિસ્તાનના પ્રયાસો નિષ્ફળ

જુદી જુદી અહેવાલો મુજબ પાકિસ્તાનના વડાપ્રધાન અને આર્મી ચીફ દ્વારા અમેરિકા-ભારત સંબંધોને અસર કરવા માટે પ્રયાસો કરવામાં આવ્યા હતા. પરંતુ અમેરિકા દ્વારા ડીલને લીલી ઝંડી આપવામાં આવતા આ તમામ પ્રયાસો નિષ્ફળ રહ્યાં છે.

વ્યૂહાત્મક ભાગીદારીને મળશે વધુ બળ

અમેરિકા અનુસાર, આ હથિયારોના વેચાણનો ઉદ્દેશ્ય ભારતની રક્ષા ક્ષમતા વધારવાનો છે જેથી તે વર્તમાન અને ઊભરતા જોખમોનો અસરકારક રીતે સામનો કરી શકે.
આ ડીલથી —

• ભારત પોતાની માતૃભૂમિ રક્ષા વ્યવસ્થા મજબૂત બનાવશે
• પ્રાદેશિક સુરક્ષા પડકારોનો સામનો કરવાની ક્ષમતા વધશે
• બંને દેશો વચ્ચેની દ્વિપક્ષીય વ્યૂહાત્મક ભાગીદારીને વધુ ગતિ મળશે

જેવેલિન મિસાઈલો અને એક્સકેલિબર રાઉન્ડ્સ ભારતના સંરક્ષણ ક્ષેત્રમાં મહત્વપૂર્ણ ટેકનિકલ બળ પૂરું પાડશે.