કેનેડામાં વસતા ભારતીય સમુદાય માટે ચિંતાજનક સમાચાર સામે આવ્યા છે. કેનેડાના ઓન્ટારિયો પ્રાંતમાં આવેલા ડરહામ રીજનમાં એમેઝોન વેરહાઉસમાંથી કરોડો રૂપિયાના માલસામાનની ચોરીના કેસમાં પાંચ ગુજરાતી મૂળના વ્યક્તિઓની ધરપકડ કરવામાં આવી છે. તપાસમાં ખુલ્યું છે કે આરોપીઓએ એમેઝોનનું અંદાજે 17 કરોડ રૂપિયા (લગભગ 2 મિલિયન કેનેડિયન ડોલર) જેટલું ફૂલેકું ફેરવ્યું છે.
 

લાંબી તપાસ બાદ થયો પર્દાફાશ

ડરહામ રીજનલ પોલીસના ફાઇનાન્શિયલ ક્રાઇમ યુનિટ (FCU) દ્વારા આ કેસની લાંબા સમયથી તપાસ ચાલી રહી હતી. નવેમ્બર 2025માં અજેક્સ (Ajax) શહેરના સેલેમ રોડ પર આવેલા એમેઝોન ફુલફિલમેન્ટ સેન્ટરની લોસ પ્રિવેન્શન ટીમે શંકાસ્પદ પ્રવૃત્તિઓને લઈને પોલીસનો સંપર્ક કર્યો હતો. ત્યારબાદ શરૂ થયેલી તપાસે ચોંકાવનારા ખુલાસા કર્યા.

પોલીસના જણાવ્યા મુજબ, એમેઝોનના જ બે કર્મચારીઓ છેલ્લા બે વર્ષથી સિસ્ટમેટિક રીતે વેરહાઉસમાંથી મોંઘા ઇલેક્ટ્રોનિક્સ અને અન્ય કિંમતી વસ્તુઓ બહાર કાઢી રહ્યા હતા. આ માલસામાન બાદમાં બહારના સાગરિતો સુધી પહોંચાડવામાં આવતો હતો.
 

કેવી રીતે ચાલતો હતો ચોરીનો નેટવર્ક?

તપાસમાં જાણવા મળ્યું છે કે આરોપીઓએ એમેઝોનની આંતરિક સિસ્ટમનો દુરુપયોગ કર્યો હતો. ઓર્ડર રેકોર્ડમાં ફેરફાર કરવો, માલને “ડેમેજ” અથવા “રીટર્ન” બતાવીને બહાર કાઢવો અને પછી તેને ગેરકાયદેસર રીતે વેચી દેવું—આવો સમગ્ર પ્લાનિંગ સાથેનો કૌભાંડ ચાલી રહ્યો હતો. આ સમગ્ર નેટવર્કમાં વિશ્વાસપાત્ર લોકોનો ઉપયોગ કરીને ચોરીને લાંબા સમય સુધી છુપાવવામાં આવી હતી.
 

પોલીસ કાર્યવાહી અને દરોડા

સોમવાર, 15 ડિસેમ્બર 2025ના રોજ પોલીસે પ્રથમ તબક્કામાં એમેઝોનના બે કર્મચારીઓની ધરપકડ કરી. ત્યારબાદ સ્કારબોરો (Scarborough) વિસ્તારમાં આવેલા એક રહેણાંક મકાન પર સર્ચ વોરંટ સાથે દરોડો પાડવામાં આવ્યો. અહીંથી અન્ય ત્રણ શખ્સોને પણ ઝડપી લેવામાં આવ્યા.

દરોડા દરમિયાન પોલીસે મોટા પ્રમાણમાં ચોરીનો માલ અને રોકડ રકમ જપ્ત કરી, જેમાં—

• $2,50,000 કેનેડિયન ડોલરથી વધુના હાઈ-એન્ડ ઇલેક્ટ્રોનિક્સ
• $50,000 કેનેડિયન ડોલર રોકડ

સમાવેશ થાય છે. પોલીસના જણાવ્યા અનુસાર, જપ્ત કરાયેલા માલમાં મોબાઇલ ફોન, લેપટોપ, ટેબલેટ અને અન્ય મોંઘા ગેજેટ્સનો સમાવેશ થાય છે.
 

ઝડપાયેલા પાંચ ગુજરાતી આરોપીઓ કોણ?

પોલીસ દ્વારા જાહેર કરાયેલા નામ મુજબ, તમામ પાંચ આરોપીઓ ભારતીય મૂળના છે અને તેમની અટક પરથી તેઓ ગુજરાતી સમાજ સાથે સંબંધ ધરાવતા હોવાનું જાણવા મળ્યું છે.

1. મેહુલ બળદેવભાઈ પટેલ (36) – ન્યુમાર્કેટનો રહેવાસી; ચોરી અને છેતરપિંડીના આરોપ
2. આશિષકુમાર સવાણી (31) – સ્કારબોરોનો રહેવાસી; ચોરી, છેતરપિંડી અને ગુનાહિત મિલકતની હેરાફેરી
3. બંસરી સવાણી (28) – ગુનાહિત રીતે મેળવેલી મિલકત રાખવાનો આરોપ
4. યશ ધામેલિયા (29) – ગુનાહિત મિલકત રાખવાનો આરોપ
5. જન્વીબેન ધામેલિયા (28) – ગુનાહિત મિલકત રાખવાનો આરોપ
    

હવે આગળ શું થશે?

હાલ તમામ આરોપીઓને કેટલીક કડક શરતો સાથે મુક્ત કરવામાં આવ્યા છે. આવનારા દિવસોમાં તેઓ કોર્ટમાં હાજર થશે અને તેમના વિરુદ્ધ કાયદેસરની કાર્યવાહી હાથ ધરવામાં આવશે. જો આરોપ સાબિત થશે, તો તેમને કડક સજા થવાની શક્યતા છે.
 

ભારતીય સમુદાયમાં ચર્ચા

આ ઘટનાએ કેનેડામાં વસતા ભારતીય અને ખાસ કરીને ગુજરાતી સમુદાયમાં ભારે ચર્ચા જગાવી છે. વિદેશમાં મહેનત અને ઈમાનદારીથી ઓળખ બનાવનારા હજારો ભારતીયો માટે આવી ઘટનાઓ પ્રતિષ્ઠાને નુકસાન પહોંચાડે છે. નિષ્ણાતો માને છે કે આવા કેસો નવા ઇમિગ્રન્ટ્સ માટે પણ મુશ્કેલીઓ ઊભી કરી શકે છે.

કેનેડામાં એમેઝોન જેવી વૈશ્વિક કંપની સાથે જોડાયેલા આ કૌભાંડથી સ્પષ્ટ થાય છે કે ગેરકાયદેસર પ્રવૃત્તિઓ સામે ત્યાંની પોલીસ અને કંપનીઓ કડક વલણ ધરાવે છે. આ ઘટના વિદેશમાં રહેતા દરેક ભારતીય માટે ચેતવણી સમાન છે કે કાયદાની પકડથી કોઈ બચી શકતું નથી.