મુંબઈ,

મુંબઈમાં બોલિવૂડ અભિનેતા ટાઈગર શ્રોફની કાર પર થયેલા ગોળીબારના કેસમાં તપાસ તેજ કરવામાં આવી છે. મુંબઈ પોલીસની ક્રાઈમ બ્રાન્ચે આ કેસમાં ચાર આરોપીઓની ધરપકડ કરી છે, જ્યારે ગેંગસ્ટર અનિલ પંડિતને વોન્ટેડ આરોપી તરીકે દર્શાવવામાં આવ્યો છે. પોલીસના જણાવ્યા અનુસાર, અનિલ પંડિતે સોશિયલ મીડિયા પોસ્ટ દ્વારા 18 ઓક્ટોબરે થયેલા હુમલાની જવાબદારી સ્વીકારી હતી.

ધરપકડ કરાયેલા આરોપીઓમાં હરિયાણાના સોનીપત જિલ્લાના રહેવાસી કુણાલ (21) અને સુમિત (19) તથા ઉત્તર પ્રદેશની રહેવાસી રાધા (23) અને બબીતા (23)નો સમાવેશ થાય છે. પોલીસે ચારેય આરોપીઓને એસ્પ્લેનેડ મેજિસ્ટ્રેટ કોર્ટમાં રજૂ કર્યા હતા. બંને પક્ષોની દલીલો સાંભળ્યા બાદ કોર્ટે આરોપીઓને 26 ઓક્ટોબર સુધી પોલીસ કસ્ટડીમાં મોકલવાનો આદેશ આપ્યો હતો.

પોલીસે કોર્ટમાં જણાવ્યું હતું કે ગોળીબારના કાવતરામાં આ ચારેય આરોપીઓએ હથિયારોની વ્યવસ્થા કરવામાં અને તેને અન્ય કાવતરાખોરો સુધી પહોંચાડવામાં ભૂમિકા ભજવી હતી. તપાસ મુજબ, અનિલ પંડિતના કહેવાથી કુણાલ અને સુમિતે અમૃતસરથી એક પિસ્તોલ અને 20 કારતૂસ મેળવ્યાં હતાં. બીજી તરફ, રાધા અને બબીતાએ દિલ્હીથી મુંબઈ પહોંચીને અન્ય આરોપીઓને હથિયાર સોંપ્યાં હોવાનો પોલીસનો દાવો છે.

જોકે, બચાવ પક્ષના વકીલોએ આરોપીઓ સામે પૂરતા પુરાવા ન હોવાનું જણાવી તેમની ધરપકડ સામે દલીલો કરી હતી. હાલ પોલીસ આ સમગ્ર મામલે વધુ તપાસ કરી રહી છે.

ઉલ્લેખનીય છે કે 18 ઓક્ટોબરની સાંજે મુંબઈના જુહુ વિસ્તારમાં ટાઈગર શ્રોફની કાર પર ઓછામાં ઓછા બે શખ્સોએ ગોળીબાર કર્યો હતો અને ત્યારબાદ મોટરસાઈકલ પર ફરાર થઈ ગયા હતા. આ ઘટનામાં અભિનેતાને ઈજા થઈ નહોતી, પરંતુ તેમના ડ્રાઈવર અને એક રાહદારી ઘાયલ થયા હતા. કેસમાં અન્ય સંડોવાયેલા લોકોની ભૂમિકા અંગે પણ તપાસ ચાલુ છે.