રાજકોટ,

સમસ્યા ઉકેલ નહીં આવે તો વેરો નહી  ભરવાની ચીમકી

શહેરમાં પાણી વિતરણ વ્યવસ્થાને લઈને નાગરિકોની મુશ્કેલીઓ દિન-પ્રતિદિન વધતી જતી જોવા મળી રહી છે. તાજેતરમાં શહેરમાં જાહેર કરાયેલા પાણીકાપ અને વિતરણ વ્યવસ્થાના પ્રથમ જ દિવસે રાજકોટ શહેરના વોર્ડ નં. 5 વિસ્તારમાં મહિલાઓનો રોષ ફાટી નીકળ્યો હતો. સ્થાનિક રહેવાસીઓએ તંત્ર સામે મોરચો ખોલતા ગંભીર આક્ષેપો કર્યા હતા કે, આ વિસ્તારમાં છેલ્લા ઘણા સમયથી પૂરતા પ્રમાણમાં અને નિયમિત પાણી મળતું નથી, જેના કારણે સામાન્ય જનજીવન ભારે પ્રભાવિત થયું છે.

પાણીની વિકટ સમસ્યાથી ત્રસ્ત બનેલી મહિલાઓએ રોષ વ્યક્ત કરતા સ્પષ્ટ શબ્દોમાં ચીમકી ઉચ્ચારી હતી કે, જો તંત્ર દ્વારા આ ગંભીર સમસ્યાનું વહેલી તકે નિરાકરણ લાવવામાં નહીં આવે, તો આગામી દિવસોમાં સ્થાનિકો દ્વારા પાલિકા કે તંત્રને વેરો ભરવાનું સદંતર બંધ કરી દેવામાં આવશે. મહિલાઓના જણાવ્યા મુજબ, મૂળભૂત સુવિધાઓ પૂરી પાડવામાં તંત્ર નિષ્ફળ સાબિત થઈ રહ્યું છે ત્યારે આવી સ્થિતિમાં વેરો ભરવાનો કોઈ ઔચિત્ય રહેતું નથી.

સ્થાનિક મહિલાઓ અને રહેવાસીઓની માંગ છે કે મહાનગરપાલિકા દ્વારા તાત્કાલિક ધોરણે વોર્ડ નં. 5માં નિયમિત અને પૂરતા પ્રેશરથી પાણી પુરવઠો શરૂ કરવામાં આવે, જેથી નાગરિકોને આ આકરી ગરમી કે દિનચર્યામાં પાણી માટે વલખાં ન મારવા પડે.