શ્રીનગર / જમ્મુ,

ચીનના શિનજિયાંગ અને લદાખ સરહદ નજીક કેન્દ્રિત રહ્યો ભૂકંપ

જમ્મુ-કાશ્મીર અને લદાખના સીમાવર્તી વિસ્તારોમાં ગુરુવારે મોડી રાત્રે ભૂકંપના જોરદાર આંચકા અનુભવાતા સ્થાનિક લોકોમાં ભારે ફફડાટ અને ગભરાટ ફેલાઈ ગયો હતો. નેશનલ સેન્ટર ફોર સિસ્મોલોજી અને આંતરરાષ્ટ્રીય ભૂકંપ સંશોધન કેન્દ્રોના જણાવ્યા અનુસાર, આ ભૂકંપની તીવ્રતા રેક્ટર સ્કેલ પર 5.1 માપવામાં આવી હતી. આ ભૂકંપનું કેન્દ્ર લદાખ સરહદ નજીક ચીનના શિનજિયાંગ ક્ષેત્રમાં હોવાનું સામે આવ્યું છે, જેના આંચકા જમ્મુ-કાશ્મીર તથા આસપાસના વિસ્તારોમાં તીવ્રપણે અનુભવાયા હતા.
મોડી રાત્રે અચાનક ધરતી ધ્રૂજવા લાગતા લોકો ઊંઘમાંથી જાગી ગયા હતા અને ડરના માર્યા પોતાના ઘરોમાંથી બહાર ખુલ્લા વિસ્તારોમાં દોડી આવ્યા હતા. જોકે, સદભાગ્યે આ આંચકાના કારણે પ્રાથમિક અહેવાલો મુજબ જાનહાનિ કે મોટા નુકસાનના કોઈ અહેવાલ પ્રાપ્ત થયા નથી.