નવી દિલ્હી, 

અમેરિકી અંતરિક્ષ એજન્સી નાસાએ ખગોળ વિજ્ઞાનના ઇતિહાસમાં એક નવો માઇલસ્ટોન સ્થાપિત કરતા 'નેન્સી ગ્રેસ રોમન સ્પેસ ટેલિસ્કોપ'નું સફળ પ્રક્ષેપણ કર્યું છે. આ અતિઆધુનિક મિશન દ્વારા વૈજ્ઞાનિકો પૃથ્વીની બહાર નવી દુનિયા અને બ્રહ્માંડના સૌથી મોટા રહસ્યો પરથી પડદો ઉઠાવવા માટે તૈયાર છે. ફ્લોરિડા સ્થિત કેનેડી સ્પેસ સેન્ટરથી સ્પેસએક્સના ફાલ્કન હેવી રોકેટ દ્વારા આ મહત્વાકાંક્ષી મિશનને અંતરિક્ષમાં મોકલવામાં આવ્યું છે. ​આ નવું સ્પેસ ટેલિસ્કોપ પૃથ્વીની આસપાસ પ્રદક્ષિણા કરવાને બદલે પૃથ્વીથી અંદાજે ૧૫ લાખ કિલોમીટર દૂર આવેલા સૂર્ય-પૃથ્વી લાગ્રેન્જ પોઈન્ટ-૨ (L2) પર સ્થિર થશે. આ ટેલિસ્કોપનું પ્રાઈમરી મિરર હબલ સ્પેસ ટેલિસ્કોપ જેટલું જ ૨.૪ મીટરનું છે, પરંતુ તેનું અદ્યતન 'વાઈડ ફિલ્ડ ઈન્સ્ટ્રુમેન્ટ' હબલ કરતા ઓછામાં ઓછા ૧૦૦ ગણા મોટા આકાશી વિસ્તારનું એકસાથે સર્વેક્ષણ કરવાની ક્ષમતા ધરાવે છે. જ્યાં જેમ્સ વેબ ટેલિસ્કોપ કોઈ ચોક્કસ પિંડનું ઊંડાણપૂર્વક નિરીક્ષણ કરે છે, ત્યાં રોમન ટેલિસ્કોપ આખા આકાશનો વિશાળ નકશો તૈયાર કરશે.​​આ મિશનનો મુખ્ય ઉદ્દેશ્ય બ્રહ્માંડના 'ડાર્ક મેટર' અને 'ડાર્ક એનર્જી'ની પ્રકૃતિને સમજવાનો છે. આ ઉપરાંત, આ મિશન આપણી આકાશગંગા તેમજ તેની બહાર આવેલા હજારો નવા સૌરમંડળ બહારના ગ્રહોની ખોજ કરવામાં સીમાચિહ્નરૂપ સાબિત થશે.